ardi.am ՄարզաԴիտակ

Ստեղծարար ու երիտասարդական Հրազդանը

02.02.2022



Հրազդանը ճանաչվել է 2022թ․ Հայաստանի երիտասարդական մայրաքաղաք։ Հրազդանցի երիտասարդներն ակտիվ են, մշակութասեր, մշակութային ժամանցն ապահովելու վայրերն ու առիթները՝ սահմանափակ։ Զբաղվածության առումով նույնպես խնդիրները շատ են: Այս մասին ardi.am-ի հետ զրույցում ասաց «Հայի բռունցք» երիտասարդական-մշակութային հասարակական կազմակերպության հիմնադիր-նախագահ Գարիկ Աղասյանը։

Հրազդանը՝ երիտասարդական մայրաքաղաք

Հրազդանը ճանաչվեց երիտասարդական մայրաքաղաք  տեղի ակտիվ երիտասարդության շնորհիվ։ «Հայի բռունցք»-ը տվյալ մրցույթին հայտ չի ներկայացրել,  գործընկեր կազմակերպություններն են դիմել, բայց  ԿԳՄՍՆ-ի մոնիթորինգային հանձնաժողովը Հրազդանի երիտասարդական ռեսուրսը գնահատելիս  հանդիպել է մեր կազմակերպության հետ, ծանոթացել իրականացրած աշխատանքներին, կամավորներին։ 

Ի՞նչ է սպասվում երիտասարդական մայրաքաղաքին

Հաղթող կազմակերպությունները հնարավորություն են ստանում իրականացնելու միջազգային և տեղական համաժողովներ, սեմինարներ, կյանքի կոչելու երիտասարդական տարաբնույթ նախագծեր։ Հրազդանցի երիտասարդներին հնարավորություն է ընձեռվում մասնակցելու միջոցառումներին։ «Հայի բռունցք»-ի պարագայում հարթակն է ընդլայնվում․ հրազդանցի ստեղծագործողների ճանաչելիությանը միտված ծրագրեր ենք իրականացնելու՝  շարունակելով նաև ընթացիկ միջոցառումները։

Հրազդան, Սահմանադրության հրապարակ, Բարության պուրակ



«Ստեղծագործ հրազդանցի» 

«Հայի բռունցքի»-ը, որպես ակտիվ երիտասարդական խումբ, հիմնվել է  2013-2014թթ։ 2014-ին տպագրվել է իմ «Վաճառականի տղան» մոտիվացիոն գիրքը, որն ավելի շատ  հասարակական ակտիվության կոչ էր հանրությանը։ Գիրքը, կարելի է ասել, մեր առաջին նախագիծն էր։ 2018-ից արդեն իրավաբանական անձի կարգավիճակ ենք ստացել։ Իրականացրել ենք շուրջ 300 նախագիծ։ Ցանկանում եմ առանձնացնել «Ստեղծագործ հրազդանցի» նախագիծը, որի շրջանակում ֆեյսբուքյան հարթակում ներկայացրել ենք տեղի ստեղծագործողների գրական աշխատանքները։ Այս պահին չի թարմացվում էջը, այն ասես էլեկտրոնային գիրք լինի, որտեղ կարող են ընթերցել հրազդանցիների աշխատանքները։ Նախագծին նոր շնչառություն տալու մտադրություն ունենք։ Շուտով նաև կմեկնարկի «Հանդիպում բեմում» նախագիծը, որը կյանքի ենք կոչելու Հրազդանի դրամատիկական թատրոնի հետ համագործակցությամբ։

Հրազդանի դրամատիկական թատրոնի դահլիճը


Հրազդանի թատրոնը

Հրազդանի դրամատիկական թատրոնում տարիներ շարունակ գրեթե ոչինչ տեղի չի ունեցել և՛ ստեղծագործական, և՛ շենքային պայմանները բարելավելու իմաստով։ Պատճառներն ինձ հայտնի չեն, արձանագրում եմ փաստը։ Սակայն վերջին երկու տարիներին թատրոնի տնօրեն Վահագն Մարգարյանի նախաձեռնությամբ բավականին քայլեր են արվում. թատրոնը հանդես է եկել նոր ներկայացմամբ, հանդիսատեսի թիվն ավելացել է, լուծվել է ջեռուցման խնդիրը, ինչը շատ կարևոր է, հատկապես՝ հրազդանյան կլիմայի պայմաններում։ Շենքում որոշ հատվածներ վերանորոգվել են։ Մեր ՀԿ-ի միջոցներով կահավորվել է թատրոնի բակը, նստարաններ են տեղադրվել։ Թատրոնի տարածքն ավելի հարմարավետ ու անմիջական է դարձել. մարդիկ այցելում են՝ թեկուզ հանգիստն անցկացնելու նպատակով։

Թատերական այգի

Մշակութային կյանքը 2020-ից առաջ ու հետո

Պատերազմից առաջ ու հետո փոխվել է խնդիրների առաջնահերթությունը, մարդկանց վերաբերմունքը տարբեր հարցերի նկատմամբ։ Հրազդանի գրողները պատերազմից առաջ գրքերի շնորհանդեսներ էին անում, որոշակի ակտիվություն ցուցաբերում։ Հիմա մոտիվացիայի պակաս ենք տեսնում։ Հրատարակված գրքերի մասին պատահական ենք իմանում։ Համավարակը նույնպես  իր ազդեցությունն ունեցավ, ավագ սերունդը բառիս բուն իմաստով մեկուսացել է հասարակությունից։

Պատերազմի ընթացքում բանաստեղծ Սուրեն Դավթյանի նախաձեռնությամբ և մեր կամավորների մասնակցությամբ տեղի  ունեցավ «Հաղթելու ենք և՛ գրչով, և՛ զենքով» խորագրով տոնավաճառ։ Երեք օր շարունակ հրազդանցի ստեղծագործողներն իրենց գրքերն ազատ վաճառքի դրեցին, վաճառքից ստացված  հասույթը փոխանցեցին «Զինվորների աջակցության հիմնադրամին»։ Հրազդանցիներն էլ ակտիվ մասնակցություն ունեցան՝  որպես հաճախորդ։ Նախագիծը կայացավ, բայց թող էլ չլինեն նման առիթներ։

Ունենք նաև տաղանդավոր նկարիչներ, կառանձնացնեմ Հայկ Բարսեղյանին, որի մասին նաև ֆիլմ ենք նկարահանել։ Մեր կազմակերպությունը հիմնել է Կարիերայի զարգացման կենտրոն․ փորձելու ենք աջակցել երաժշտական արվեստի ներկայացուցիչներին։ Գրեթե չկա արվեստի  ճյուղ, որ Հրազդան համայնքում չունենա ներկայացուցիչ, պարզապես հրազդանցիները հանդես են գալիս ավելի շատ Հրազդանից դուրս։

Մշակութային կյանքն առհասարակ

Ցավոք ընտրությունը խիստ սահմանափակ է։ Մշակութասեր երիտասարդները թերևս կարող են թատրոն այցելել, մասնակցել մշակութային միջոցառումների, որոնք կազմակերպվում են մեր կենտրոնում, Հրազդանի ազգային պատկերասրահում, Կոտայքի մարզային գրադարանում։ Գործում են նաև երաժշտական դպրոցներ, երիտասարդական պալատ, ամեն մեկն իր չափով փորձում է մշակութային կրթությունն ու աշխուժությունն ապահովել, բայց անելիք շատ կա։

«Երիտասարդական մայրաքաղաք» տիտղոսը

«Երիտասարդական մայրաքաղաք» տիտղոսը չեմ դիտարկում որպես հաջողությունների բանալի, որից հետո ամեն բան լավ է լինելու։ Անկախ նրանից՝ կդառնա՞ր Հրազդանը Հայաստանի երիտասարդական քաղաք, թե՞ ոչ, հասարակության ներսում անելիքներ ունենք․ պետք է սեր արթնացնենք մշակույթի նկատմամբ,  մոտիվացնենք ստեղծագործողներին, ամենակարևորը՝ ապահովենք երիտասարդների զբաղվածությունը տարբեր ոլորտներում։

«Խաչե մատուռ Հրազդան» հուշակոթող

Հրազդանի երիտասարդի հայացքը դեպի նե՞րս է, թե՞ դուրս

Ցավոք, հիմնականում դեպի դուրս։ Երևանի համալսարաններում մեծ թիվ են կազմում հրազդանցիները։ Շատ են նրանք, որ հնարավորություն ունեն սովորելու և մնալու մայրաքաղաքում, ովքեր կվերադառնան՝ զարգացնելու Հրազդանը, բնականաբար, ավելի քիչ են։ Ինքս ուսանողական տարիներին ստացել եմ առաջարկներ Երևանում, արտերկրում աշխատելու (մասնագիտությամբ ինժեներ-մարքեթոլոգ է- հեղ․), բայց Հրազդանն ինձ հետ է կանչել։ Չեմ կարող մեղադրել  երիտասարդներին հետ չգալու համար, որովհետև այստեղ դեռևս հնարավորություններ ստեղծված չեն նրանց համար։ Միջավայր պետք է լինի, որ գան, գործունեություն իրականացնեն։ Բայց դրական միտում կա։ 

 Զբոսաշրջիկներին կարո՞ղ է գրավել Հրազդանը

Կարևոր հարց է։ Հրազդանում զբոսաշրջության զարգացումը նաև մեր կազմակերպության մտահոգությունների շրջանակում է։ Զբոսաշրջային վայր կարելի է դարձնել Եղևնիների պուրակը, որը նաև առողջապահական նշանակություն ունի, Հրազդանի արհեստական ջրամբարը, եթե ոռոգման հարցերը լուծվեն։ Կան  եկեղեցիներ, հին պատմական իջևանատուն։ Ամռանն այստեղ զով է, ձմռանը՝ ոչ շատ ցուրտ։ Տարվա ցանկացած եղանակին կարելի է հանգստանալ։ Նաև լավ խոհանոց ունի Հրազդանը։ Բայց կա մի առաջնային  խնդիր, որը կարգավորելուց հետո նոր միայն կարող ենք մտածել զբոսաշրջությունը զարգացնելու մասին։ Խոսքը երթուղու մասին է։ Կարիք կա, որ Հրազդանը կենտրոնական ավտոկայան ունենա, որովհետև  մարզկենտրոն է, նաև՝ խաչվող ուղի․ քարտեզով էլ որ նայեք՝  Հայաստանի կենտրոնում է գտնվում։ Եվ իհարկե  պետք է մտածել հյուրանոցային բարձրակարգ համալիր ունենալու մասին։

Ծովինարի արհեսական ջրամբար

Ինքնաֆինանսավորում

Ստեղծում ենք հնարավորութուն և օգտագործում դրանք՝ հանուն կազմակերպության զարգացման։ Մենք նաև Կապանում կրթական կենտրոնի մասնաճյուղ ունենք։ Համագործակցում ենք հայաստանյան շուրջ 300 ակտիվ հասարակական ներկայացուցիչների հետ։ Գտնվում ենք Հրազդանում, բայց  նեղ համայնքային կառույց չենք, փորձում ենք գործել Հայաստանով մեկ՝ հնարավորությունների սահմաններում։

Երիտասարդական կենտրոն ենք կառուցում մեր կամավորների ուժերով։ Արդեն պատրաստ է  ձայնագրման ստուդիան, որը  երիտասարդներին հնարավորություն կտա գործիքավորման ու ձայնագրման։ Շուտով սեմինարների սրահը պատրաստ կլինի, նաև կամավորական ակադեմիա ենք ցանկանում հիմնել։

Գտնվելու վայրը

Տարածքը, որտեղ գործունեություն ենք իրականացնելու, տրամադրել է Հրազդանի համայնքապետարանը։ Կիսաքանդ մանկապարտեզի մի բաժին է, որը մեր խնդրանքով հատկացվել է մեզ 20 տարի ժամկետով՝  առանց վարձակալության, վերանորոգելու պայմանով։ Արդեն վերանորոգման աշխատանքներ տարվում են, մոտ 7 մլն ներդրում ենք արել, այդչափ էլ կներդնենք առաջիկայում, և կենտրոնը պատրաստ կլինի։ 

Վերջում

Ես պարզապես կուզեի, որ արվեստագետները, մշակութային գործիչներն  այցելեն մեզ, միջոցառումներ անցկացնեն, իմանան, որ այստեղ կարող են ինքնադրսևորվել, նախագծեր իրականացնել։

Ardi.am

No Comments

Leave a Reply