«Երազը» (ֆր.՝ Le Rêve, անգլ.՝ The Dream) Պաբլո Պիկասոյի սյուրռեալիստական ոճով
արված ամենահայտնի ստեղծագործություններից է։ Նկարում պատկերված է կարմիր բազկաթոռում քնած նկարչի քսաներկուամյա սիրուհին՝ Մարիա-Թերեզա Վալտերը։ Կնոջ երեսը բաժանված է երկու մասի՝ մեկը բաց երանգով ու խաղաղ, մյուսը՝ մուգ և կրքոտ։ Դա ցուցադրում է վերջինիս բնավորության երկվությունն ու Պիկասոյի հետ սիրով ու խանդով լի հարաբերությունները։
Նկարը ստեղծվել է մեկ օրում՝ 1932 թվականի հունվարի 24-ին, Փարիզում, որտեղ Պիկասոն ապրում էր իր օրինական կնոջ՝ Օլգայի, և որդու՝ Պաուլոյի հետ։ 1927 թվականից ի վեր, երբ նկարիչը հանդիպեց Մարիա-Թերեզային, նրանք գաղտնի կապի մեջ էին։ Նա Պիկասոյի «մուսան» էր ու ներկա է նրա այդ շրջանի բազմաթիվ նկարներում։ «Երազը» կտավը Պիկասոյի, այսպես կոչված, «վարդագույն
ժամանակաշրջանի» գործերից է, երբ նա իր զգացմունքները արտահայտում էր պայծառ և ուրախ գույներով։
Հետաքրքիր և դրամատիկ է նաև «Երազը» նկարի պատմությունը։ 1941 թվականին այն 7000 դոլարով գնեցին գործարար և կոլեկցիոներ Վիկտոր Գանցն ու նրա կինը՝ Սալլին։ Վերջիններիս մահից հետո նկարը «Քրիստիս» աճուրդային տանը 48,4 միլիոն դոլարով վաճառվեց բանկիր Վոլֆգանգ Ֆլյոտլին։ 2001 թվականին այն 60 միլիոն դոլարով գնեց ամերիկացի միլիարդատեր Սթիվ Ուինը։ 2006 թվականին Ուինը արմունկով պատահաբար պատռեց կտավը և վերականգնումից հետո ապահովագրական ընկերությունից 40 միլիոն դոլար ստացավ։ 2013 թվականին նա նկարը վաճառեց Սթիվեն Քոենին 155 միլիոն դոլարով։ Այսպիսով այն դարձավ աշխարհի ամենաթանկ նկարներից մեկը։
«Երազը» ոչ միայն արվեստի գլուխգործոց է, այլև Պիկասոյի անձնական կյանքի և ապրած դարաշրջանի վկայությունը։
Թարգանեց Իսրայել Ասրյանը
Աղբյուր․՝ dzen.ru