Վահագն Խաչատրյանի և Արեն Մելիքյանի խաղարկային-վավերագրական ֆիլմը՝ «5 երազողները և ձին», ներկայացնում է տարաբնույթ, ինչ-որ տեղ հակասական երազանքների մասին մի կինոպատում: Երազանքներ, որոնք նյութական, զգացմունքային, կենցաղային, անգամ՝ ֆիզիոլոգիական ու այնկողմնային աշխարհի հարթություններում են: Իսկ երազողների երազանքների միջով երևակվում է սիգաճեմ, վարգող, պարզապես գոյակցող ձին, ըստ ժողովրդական հավատալիքի՝ երազատու կենդանին: Ֆիլմի հեղինակները ներկա ու աններկա իրենց հերոսների մասին պատմություններում թողել են բազմաթիվ կախման կետեր, որոնք յուրաքանչյուր կինոդիտող կարող է գաղտնազերծել յուրովի: Եվ այդ անելու հերթկան հնարավորությունն է ընձեռված հայաստանյան հանդիսատեսին:
Հունիսի 30-ին՝ ժամը 20:00-ին, Կինոյի տան մեծ դահլիճում կկայանա ֆիլմի ցուցադրությունը, որի թրեյլերը կարող եք դիտել հետևյալ հղումով՝ https://vimeo.com/838304060?share=copy:
Oolik production-ի (https://oolikproduction.com/) արտադրած այս ֆիլմի համաշխարհային պրեմիերան տեղի է ունեցել շվեյցարական Visions du Réel հեղինակավոր փառատոնում։ Այնուհետև ֆիլմը ցուցադրվել է ավելի քան 30 երկրների լավագույն փառատոններում (HotDocs, Dok Leipzig, FIdMarseille, Camden IFF, RIDM, Jihlava, Dokufest, Makedox, Goeast Wiesbaden, Cinedoc Tbilisi…):
Նոմինացվել է վավերագրական կինոյի հայտնի մրցանակների (silver Eye Award, Doc Alliance award): Ավստրիական Եթնոսինկա (Ethnocineca IDFF) միջազգային կինոփառատոնում արժանացել է ժյուրիի հատուկ հիշատակում մրցանակին:
Ֆիլմի մասին գրել են հեղինակավոր մի շարք պարբերականներ (SCREENDAILY , CINEUROPA, POV magazine, Business Doc Europe):
«5 երազողները և ձին» ֆիլմի տոմսերը կարող եք ձեռք բերել նաև առցանց (https://tkt.am/am//eid/577):
Գուցե ինչ-որ մեկն այս դիտումից հետո կձևակերպի իր երազանքն ու կորոնի դեպի երազատու ձին տանող իր ճանապարհը:
Կարինե Ռաֆայելյան
No Comments