2021 թվականի ամենադիտարժան սերիալները

Հմայիչ Թոմ Հիդելսթոնը՝ Լոկիի դերում, Հենրի Քավիլը՝ Կախարդի կերպարում, ինչպես նաև «Սեռական դաստիարակություն» ֆիլմի նոր եթերաշրջանն ու «Ընկերների» վերադարձը։ Ահա 2021-ի ամենասպասված սերիալների ցանկը։ 

ՎանդաՎիժն 

Սուպերհերոսական ֆիլմերի բոլոր երկրպագուների համար Disney+ պլատֆորմում Կարմիր Վհուկի և Վիժնի մասին սերիալ է դուրս գալիս։  Կարմիր կախարդուհու դերում կհայտնվի Էլիզաբեթ Օլսենը, իսկ Վիժնին կմարմնավորի Փոլ Բեթանին։

Ըստ սյուժեի՝ «Վրիժառուները․ Վերջնախաղ» ֆիլմի իրադարձություններից հետո Վանդան և Վիժնն ապրում են ընտանեկան խաղաղ կյանքով, բայց սկսում են կասկածել, որ իրենց իրականությունն այն չէ, ինչ թվում է․․․

Լիզիի պատմությունը 

էկրանավորումն է Սթիվեն Քինգի համանուն վեպի, որը 2006-ին գլխավորել էր բեսթսելերների ցուցակը։ Գլխավոր դերը խաղում է Ջուլիան Մուրը․ նրա հերոսուհին՝ Լիզին, վերջերս կորցրել է ամուսնուն՝ գրող-ֆանտաստ Սքոթ Լենդոնին։ Ամուսնու մահից հետո նա դասավորում է գրողի ձեռագրերը, փորձում պարզել ամուսնու անցյալը, որտեղ  միստիկ գաղտնիքներ են եղել։

Լոկի 

Այս տարվա ամենասպասված պրեմիերաներից մեկը՝ Լոկիի արկածների մասին Marvel Studios-ի մինիսերիալն էր։ Թոմ Հիդելսթոնը կվերադառնա իր խորամանկ և նենգ Լոկիի դերին։ Սերիալի իրադարձությունները զարգանում են «Վրիժառուները․ Վերջնախաղ» ֆիլմից հետո։ Նենգ Լոկին օգտագործում է Տեսերակտը՝ ժամանակի միջով ճանապարհորդելու և մարդկության պատմությունը փոխելու համար։ 

Սեռական դատիարակություն 

Փայլուն կատակերգական սերիալը Netflix է վերադառնում երրորդ եթերաշրջանով։ «Սեռական դաստիարակությունը» վերադառնում է նոր դերասանական կազմով (այդ թվում՝ Ջեյսոն Այզեքսը և Ջեմայմա Քըրքը)։ Քըրքը մարմնավորում է նոր տնօրենին, որը կոչված է վերադարձնելու դպրոցին երբեմնի փառքը։ 

Կախարդը 

Համաձայնեք՝ Հենրի Քավիլի  վերադարձը Կախարդի դերին, վերջին շրջանի ամենալավ  նորություններից է։ Նոր սերիաներում Ռիվիացի Գերալթը ստիպված կլինի երկու նոր հրեշների հետ բախվել։ 

Ստորգետնյա երկաթուղին 

Amazon-ում եթեր է դուրս  գալիս վերջին տարիների ամերիկյան ամենաաղմկոտ վեպի էկրանավորումը։

Բարակ Օբաման «Ստորգետնյա երկաթուղին» ամերիկյան մեծ վեպ կոչեց, և այն ներառեց գրքերի վարկանիշային իր աղյուսակում, որի մեջ ներառված ժողովածուները անհրաժեշտ է կարդալ բոլորին։ Գիրքը լույս է տեսել 2016 թվականին և ստացել գլխավոր գրական մրցանակները։

Իրադարձությունները տեղի են ունենում Ամերիկայում՝ քաղաքացիական պատերազմից առաջ և պատմում ստրկությունից ազատվելու մասին։

Ընկերների վերամիավորումը 

Արդեն պաշտոնապես՝ «Ընկերները վերադառնում» են։ Դա չի լինելու լիարժեք սերիա, այլ ավելի շուտ խոսակցական շոուի ձևաչափ բոլոր հերոսների հետ։ Այնուհանդերձ՝ սա հրաշալի նորություն է։ 

Էմիլին Փարիզում 

2020 թվականի ամենաքննարկված և ոչ միանշանակ «Էմիլին Փարիզում» սերիալը կունենա երկրորդ եթերաշրջան։ Սյուժեի մասին դեռ քիչ բան է հայտնի։ Գլխավոր դերակատարուհի Լիլի Քոլինզը բրիտանական  Vogue-ին տված հարցազրույցում հույս է հայտնել, որ Էմիլին աշխատանքից դուրս ավելի շատ ժամանակ կանցկացնի Savoir-ի իր գործընկերների հետ, կբարելավի իր ֆրանսերենը և քաղաքում իրեն կզգա ոչ թե հյուր, այլ բնակիչ։ Այդուհանդերձ, դա չի խանգարելու, որ Էմիլին շարունակի հայտնվել զվարճալի իրավիճակներում։ 

Բացահայտելով Աննային 

Լեգենդար պրոդյուսեր Շոնդա Ռայմսի նոր նախագիծը։ Սերիալի հիմքում իրական պատմությունն է, որ տեղի է ունեցել Նյու Յորքում 2014 թվականին։ Ոմն Աննա Դելվի, որը գործնականում խաբեբա էր, գերմանացի միլիոնատերուհի ձևանալով, խաբել է հարյուրավոր մարդկանց՝ ստիպելով վճարել իր հաշիվներին։  Խարդախության համար Աննային 12 տարով ազատազրկման դատապարտեցին, իսկ նրա պատմությունը լույս տեսավ New York Magazine-ում, որի «Как Анна Делви обманула нью-йоркскую тусовку» հոդվածի հիման վրա էլ նկարահանվել է սերիալը։ Գլխավոր դերում երիտասարդ դերասանուհի Ջուլիա Գարներն է։

Ինը կատարյալ անծանոթները 

 «Ինը կատարյալ անծանոթները» բեսթսելերը Լիանա Մորիարթիինն է՝ «Մեծ փոքր ստերի» հեղինակինը։ Նրա գիրքը սերիալի կվերածի «Էմմիի» երկակի դափնեկիր Դեւիդ Էդվարդ Քելլին։ Այդ խմբին կմիանան՝ գլխավոր դերերում Նիկոլ Քիդմանն ու Մելիսա Մաքարթին։ «Ինը կատարյալ անծանոթները» թրիլեր է էլիտար հանգստավայր եկած ինը հաջողակ մարդկանց մասին։ Այնտեղ տնօրինում է խորհրդավոր Մաշան (Նիկոլ Քիդմանը), որը պատրաստ է օգնել իր հաճախորդներին նոր կյանք սկսել հանգստավայրում: Բայց ի՞նչ գնով: Կիմանանք շուտով։ 

Թարգմանեց Իսրայել Ասրյանը
Աղբյուր՝ vogue.ua