Ad Astra. Բրեդ Փիթը և մութ ուժերը

Հայտնի ռեժիսոր Ջեյմս Գրեյի վերջին գործը ներկայացնում է մի տիեզերագնացի, որի տիեզերական առաքելությունը վերածվում է ինքնաճանաչման փորձի:

Խիզախության և առնականության մասին պատմող Ad Astra (Անվանումը ծագում է հռոմեացի բանաստեղծ Վերգիլիոսի per aspera ad astra տողերից, որոնք թարգմանաբար նշանակում են «փշերի միջով դեպի աստղեր»: Անվանման մեջ օգտագործվել է ասույթի միայն «դեպի աստղերը» մասը: -Դ.Մ.) ֆիլմում Բրեդ Փիթը կատարում  է տիեզերագնացի դեր: Ֆիլմը  չքնաղ է, անկեղծ, քննում  է հայրերի և որդիների հարաբերությունները, որոնք լի են սիրով և փոխադարձ անձնազոհություններով: 

Շատ տիեզերական արշավախմբերի նման՝ ֆիլմում ներկայացվածը ևս չի կարողանում մեծ բարձունքներ նվաճել:Պետք է կորչել՝ գտնվելու համար. ահա այսպիսի հոգեբանությամբ են ընթանում Լուսնի հակառակ՝ մութ մասի հետազոտությունները: 

Տեսողական առումով ֆիլմը ասկետիկ է:  Ad Astra-ն կարող է հավակնել դառնալու լավագույն իզոլացված ֆիլմը: Բայց այս ամենի հետ մեկտեղ այն լուսավոր է, կինոնկարում օգտագործված են երկրաչափական պատկերներ, որոնք էլ ցույց են տալիս տիեզերական բնության ներդաշնակությունը:

Աշխատելով կինոգործիչ Հոյտե վան Հոյտեմայի և դիզայներ Քեվին Թոմսոնի հետ՝ Գրեյը կարողացել է ստեղծել մի այնպիսի տարածք, որը միաժամանակ և՛ իրական է, և՛ խորհրդապաշտական:

Բրեդ Փիթի  հոգեբանական մանրակրկիտ խաղը, որը ավելի է զարգանում ֆիլմի ընթացքում,  կարողանում է  հանդիսատեսին պահել  լարվածության մեջ, մանավանդ այն ժամանակ, երբ պատռվում է  հերոսի  կեղծ դիմակը: Մըք Բրայդը (Բրեդ Փիթի մարմնավորած կերպարը) ժամանակի մեծ մասը մենակ է անցկացնում: Նա տիեզերագնացի հանդերձանքով՝ սկաֆանդրով է, ինչն էլ շատ հաճախ ծածկում է նրա դեմքը  կամ ոսկեգույն ստվեր գցում վրան: Մըք Բրայդի ձայնը հնչում է կադրից դուրս: Սա ևս  որոշակի հմայք է տալիս դերասանի խաղին: Կինոնկարում կան շատ ուժեղ և հուզիչ պահեր, որոնք դիտողներին հստակ հաղորդագրություններ են ուղարկում:

Գրեյը տաղանդավոր  ռեժիսոր է. շատ հաճախ նա  կարողանում է կենդանացնել կադրը այնպես, որ  դրդում է  հանդիսատեսին  թռչել   նստած տեղում: 

Եվ ինչքան էլ նա դասվի այն ռեժիսորների շարքին, որոնք խոսում, բայց չեն լսվում, միևնույնն է… նա շարունակելու է խոսել:

Լուսանկարի աղբյուր` https://www.google.com/amp/s/www.forbes.com/sites/scottmendelson/2019/09/13/ad-astra-brad-pitt-liv-tyler-ruth-negga-tommy-lee-jones-james-gray-fox-disney-review-box-office-oscars/amp/

Նյութի աղբյուր՝ https://www.nytimes.com/2019/09/19/movies/ad-astra-review-brad-pitt.html?searchResultPosition=3

Անգլերենից փոխադրեց Դավիթ Մովսիսյանը