Մարդիկ են կերտում ու ապրեցնում համայնքը, երկիրը և հայրենիքը:
«Ջերմուկն ապրեցնող մարդիկ» շարքն իրականացնում է «Դեպի Ջերմուկ» քաղաքացիական նախաձեռնությունը, որի նպատակն է հանրայնացնել Ջերմուկի ողջ հմայքն ու գրավչությունը՝ մարդկանց, հայտնի ու անհայտ վայրերի միջոցով:
Սամվել Ենոքյանը Ջերմուկին գույն ու շունչ հաղորդող մարդկանցից է: Շատերը նրան գիտեն որպես գեղանկարիչ, որն ամեն օր իր կտավներով էլ ավելի է գեղեցկացնում Ըմպելասրահի՝ առանց այն էլ բացառիկ տեսարանը։ Բայց քչերը գիտեն, որ նա նաև նկարիչ-վերականգնող է (արվեստի ստեղծագործությունների վերականգնում, կոնսերվացում և պահպանում):
![](http://ardi.am/wp-content/uploads/2022/12/nkarich-samvely-enoqyan.jpg)
Սամվելն ամբողջ տարի իր նկարներով բացօթյա ցուցահանդես-վաճառք է կազմակերպում Ջերմուկի հանքային ջրերի Ըմպելասրահում՝ մեզ հաղորդակից դարձնելով արվեստի աշխարհին:
![](http://ardi.am/wp-content/uploads/2022/12/taqsist-samvel-1024x682.jpg)
-Ուստա՛ Սամվել, կգա՞ք ինձ հյուրանոցից ջրվեժ իջեցնեք։
-Ո՞նց չեմ գա։ Արդեն էդտեղ եմ,- ասում է տաքսիստ Սամվելը՝ ով ամենուր է՝ միաժամանակ Ջերմուկի և՛ Աջ ափին, և՛ Ձախ։
Նա այնքան պարտաճանաչ է ու այնքան արագ է հասնում, որ վստահ կարող եք ասել՝ Ջերմուկում անձնական վարորդ ունեք։ Սամվելը նաև հրաշալի զրուցընկեր է։ Գիտի որտեղ ինչ կա, որտեղ ինչն է համեղ, որ հյուրանոցում ազատ տեղեր կան: Ջերմուկում լինեք, ծանոթացեք Սամվելի հետ. նա ձեզ այնքան պատմելու բան ունի։
Նորաձևություն թելադրողը Ջերմուկում դերձակ Վասակն է։ Հենց նրա ձեռքի տակով են անցնում բոլոր կարևոր առիթների՝ ծնունդների, կնունքների, հարսանիքների համար նախատեսված հագուստները։
Վասակն արդեն 40 տարի է՝ դերձակությամբ է զբաղվում։ Այս տարիների ընթացքում հասցրել է հազարավոր հաճախորդներից պատվերներ ընդունել:
![](http://ardi.am/wp-content/uploads/2022/12/derdzak-vasak-1024x682.jpg)
Դերձակ Վասակը նաև բացառիկ հումորի տեր է։ Երբ լինեք Ջերմուկում ու դերձակի կարիք ունենաք, արդեն գիտեք ում դիմել:
Շահբազյան Հայկը յուրահատուկ, կոլորիտային մարդ է՝ Ջերմուկն ապրեցնող մարդկանցից մեկը: Հայկն առանձնանում է նկարչական ընդգծված ոճով և ներկերի յուրահատկությամբ: Ներկերի մեծ մասն ինքն է պատրաստում՝ քարերից: Ճիշտ կարդացիք՝ քարերից:
![](http://ardi.am/wp-content/uploads/2022/12/nkarich-hayk-shahbazyany.jpg)
Հայկն իր նկարները վաճառում է Ըմպելասրահի ներսում: Այցելեք Ջերմուկ, ընկերացեք Հայկի հետ և ծանոթացեք նրա ստեղծագործություններին:
Ավետյան Վարդանը բացառիկ տաղանդավոր նկարիչ է՝ բնության ու Ջերմուկի իսկական սիրահար: Անպայման գնացեք Ազգային պատկերասրահի Ջերմուկի մասնաճյուղ, որտեղ նա անցկացնում է իր օրվա հիմնական մասը:
![](http://ardi.am/wp-content/uploads/2022/12/nkarich-vardan-avetyany.jpg)
Վարդանի հետ շփվելով դուք կբացահայտեք մեկ այլ տիեզերք, ուր նա արարում է իր աշխարհն ու իր կերպարները:
Տաթևիկ Սարգսյան
No Comments