Մտերմիկ միջավայր և պատմություններ «Դիակոնիա» բարեգործական հիմնադրամում
Օրերս «Դիակոնիա» բարեգործական հիմնադրամում հյուրընկալվել էին Հայաստանի ուսանողական ջոկատներ (HUJ) կազմակերպության «Երիտասարդ լրագրողները հանուն ժողովրդավարության» ծրագրի մասնակիցները, որոնք հանդիպեցին հիմնադրամի աշխատակիցների և շահառուների հետ։
Հացի և հրուշակեղենի պատրաստման դասընթացի շրջանավարտ Դանիել Ղազարյանը պատմեց ինչպես է հասել հաջողության «Դիակոնիայի» շնորհիվ։
— Մեծ ընտանիքից եմ, 10 երեխա էինք, և քանի որ ընտանիքիս համար դժվար էր, 8-րդ դասարանից աշխատել եմ։ Մինչ ծրագրի մասին իմանալը՝ փայտագործությամբ էի զբաղվում։ Երբեք չէի մտածել, որ հացթուխ կդառնամ։ Սակայն որոշեցի դիմել հիմնադրամին, սովորեցի հացի և հրուշակեղենի պատրաստում։ Անհրաժեշտ գիտելիքներ ստանալուց հետո սկսեցի աշխատել մասնավոր տեղերում։
2017-ին գնացի բանակ, երբ վերադարձա, ձեռքս «փակվել» էր։ Կրկին դիմեցի ծրագրին, 2 ամիս վերապատրաստում անցա, և փոքր եղբորս օգնությամբ հիմնեցինք մեր բիզնեսը։ «Դիակոնիայի» շնորհիվ հասել եմ իմ նպատակին և այսօր ունեմ սեփական հացի արտադրամաս։
Հիմնադրամի փոխտնօրեն Աննա Ջամբազյանը ներկայացրեց խոհարար ընկեր Արմենին, որը բացեց խոհանոցային մի քանի գաղտնիքներ։
— Աշխարհում առաջին գիշերային փուռը գործել է Անի քաղաքում։ Մարդիկ գալիս էին քաղաք՝ առևտուր անելու։ Քանի որ մենք՝ հայերս, հաց տվող ժողովուրդ ենք, քաղաքապետը հրաման է տվել, որ այն մարդիկ, ովքեր ամեն երեկո գալիս են քաղաք՝ դուրս գան հացով։ Հետաքրքիրն այն է, որ գիշերը հաց թխելու սովորույթը տարածվեց ամբողջ աշխարհով։
Աննա Ջամբազյանն ասաց, որ ընկեր Արմենի հետ նպատակ ունեն բացահայտել և ներկայացնել հին հայկական հացերի մասին արտադրական տեղեկությունները։ Հավելեց․
— Մենք հաց ենք ուտում, չիմանալով, թե որտեղից և ինչպես է առաջացել այն։
Նշենք, որ «Դիակոնիան» ունի 200 ծրագիր և համագործակցում է աշխարհի տարբեր կազմակերպությունների հետ։
Ինեսա Սուքիասյան
No Comments