Արագոնացի նկարչի կտավը 2011 թվականին ճանաչվել է որպես բնօրինակ և ցուցադրվել միայն մեկ անգամ Սարագոսայում:
Մադրիդի Ռոմանտիզմի ազգային թանգարանն այս շաբաթվանից ցուցադրության է հանել Ֆրանցիսկո դե Գոյայի (1746-1828) La piedad (Տառապանք, Ողորմություն*) կտավը, որը ձեռք է բերել Մշակույթի նախարարությունը 2023 թվականի վերջին, և այն ներառվել է թանգարանի հավաքածուում՝ հիմնադրման հարյուրամյակի կապակցությամբ: Ցուցադրությունը նախատեսված է մինչև մայիսի 19-ը, թանգարանի Հանդիպումների սրահում (XXV սրահ):
Աշխատանքային ընթացք
![](http://ardi.am/wp-content/uploads/2024/03/1.jpg)
Սա վաղ շրջանի աշխատանք է, որը Գոյան նկարել է Սարագոսայում գտնվելու ընթացքում։ Ռոմանտիզմի թանգարանում է պահվում նաև արագոնացի նկարչի մեկ այլ՝ «Սուրբ Գրիգորիոս Մեծը» կտավը։ Մինչ այժմ La piedad-ը ցուցադրվել է միայն 2015 թվականին, Սարագոսայի Գոյայի թանգարանում կազմակերպված ցուցահանդեսում։ Այն 2011 թվականին ուսումնասիրել է Արտուրո Անսոն Նավարոն, իսկ 2013 թ. արվել են տարբեր տեխնիկական հետազոտություններ Պրադոյի ազգային թանգարանում։
Ստեղծագործությունը փոքր ձևաչափի կտավ է (83,5×58,0 սմ), այն պահպանում է բնօրինակ գործվածքն ու շրջանակը, և ենթադրվում է, որ պատվիրվել է եկեղեցու որևէ սպասավորի կամ Սարագոսայի բուրժուազիայի ինչ-որ ներկայացուցչի կողմից, 18-րդ դարի վերջին երեք տասնամյակում։ Այն Գոյայի կրոնական թեմայով ստեղծագործություններից է, որոնք առավել բնորոշ են վարպետի երիտասարդության տարիներին։
Գոյան «Տառապանքը» նկարել է 1771 թվականին՝ Իտալիա կատարած ուսումնական ուղևորությունից Սարագոսա վերադառնալուց հետո՝ ոգեշնչված այնպիսի արվեստագետներից, ինչպիսիք են Կառլո Մարատտին, Անիբալ Կարաչչին և Միքելանջելոն: Այդ ազդեցությունը նկատելի է նաև նկարչի՝ Սարագոսայում ծնված այլ գործերում, մի ժամանակաշրջան, երբ ընդգծվել է նրա անհատական ոճը։ Դրանցից են որոշ կարևոր պատվերների ստանձնումը, օրինակ՝ Նուեստրա Սենյորա դել Պիլարի բազիլիկը կամ Աուլա Դեյի կարտեզյան վանքի՝ Սուրբ Կույսին նվիրված որմնանկարները: Այս ժամանակաշրջանում նա վրձնել է նաև կրոնական թեմաներով փոքր կտավներ։
Կարճ ժամանակ անց՝ 1775 թվականի հունվարին, Գոյան մեկնեց Մադրիդ՝ Սանտա Բարբարայի թագավորական պալատի համար գոբելենային էսքիզներ նկարելու համար։ Թագավորական պալատ այցը շրջադարձային եղավ Գոյայի կարիերայի համար. 1799 թվականին նա դարձավ առաջին պալատական նկարիչը:
* Վերնագիրն իսպաներենից թարգմանվում է «Ողորմություն», բայց Վիքիպեդիայում ներկայացված է «Տառապանք» անունով (Շ. Ա.):
Թարգմանությունն իսպաներենից՝ Շուշաննա Ալեքսանյանի
Նյութի աղբյուր՝ https://www.elmundo.es/cultura/2024/02/15/65cde58afdddff00b18b459f.html
Ցուցադրության մասին տեսանյութ՝ https://www.youtube.com/watch?v=CwJ_6vhGlDE
Լուսանկարները՝ ըստ նյութի և google.com որոնման համակարգի
No Comments