Հ. Կարապետյանի անվան երկրաբանական թանգարանը և Դերենիկ Դեմիրճյանի տուն-թանգարանը «Եվրոպական ժառանգության օրեր» ծրագրին կմասնակցեն համատեղ նախաձեռնությամբ՝ կազմակերպելով «Բնական երևույթները Հայաստանում և Եվրոպայում՝ ըստ Դերենիկ Դեմիրճյանի ստեղծագործությունների» խորագրով միջոցառումը: Այն կանցկացվի երկու փուլով՝ Դերենիկ Դեմիրճյանի տուն-թանգարանում և Երկրաբանական թանգարանում: Մասնակիցները նախ կայցելեն դասական գրողի տուն, կծանոթանան հիմնական և ժամանակավոր ցուցադրության մեջ ներառված այն ցուցանմուշներին, որոնք առնչվում են օրվա թեմային, ինչպես և կլսեն հետաքրքիր պատմություններ այդ նյութի վերաբերյալ: Ապա Դեմիրճյանի գեղարվեստական ստեղծագործություններից կներկայացվի ծաղկաքաղ, որում հեղինակն անդրադարձել է բնությանը, Երկիր մոլորակի կենսական խնդիրներին:
Դերենիկ Դեմիրճյանի տուն-թանգարանից հյուրերը կուղևորվեն Հ. Կարապետյանի անվան երկրաբանական թանգարան (ի դեպ, Հ. Կարապետյանը եղել է Դ. Դեմիրճյանի համերկրացին, և նրանք շատ բանով են կապված միմյանց), որտեղ նրանց կներկայացվեն բնական երևույթներն ու երկրաբանական իրողությունները կոնկրետ ցուցանմուշների և թեմատիկ զրույցի տեսքով: Դա հնարավոր կդարձնի պատկերացում կազմելու, թե ինչ բաղադրիչներից է կազմված մեր բոլորի «բնակարան» Երկիր մոլորակը, և թե ինչպես պետք է հոգալ նրա մասին:
Նախատեսված են նաև այլ անակնկալներ միջոցառման մասնակիցների համար, որոնց մասին դեռ վաղ է բարձրաձայնել:
ardi.am
No Comments