«Մնա տանը» կարգախոսը և Ջերմուկի քաղաքային գրադարանը

ԿԳՄՍ նախարարության ենթակայության ներքո գործող գրադարանները կազմավորվեցին, սկսեցին գործել միասնական նախագծերի շրջանակում՝ «Մնա տանը գիրք կարդա», «Գրադարանը քո տանը»: Ստեղծված իրավիճակին ինչպե՞ս են արձագանքել համայնքային գրադարանները: Թեմայի շուրջ զրուցել ենք Ջերմուկի քաղաքային գրադարանի տնօրեն Զեմֆիրա Սարգսյանի հետ:

 — Ջերմուկի քաղաքային գրադարանը   կարողացա՞վ այս կամ այն կերպ պահել կապը ընթերցողի հետ:

— Ջերմուկի քաղաքային գրադարանը դադարեցրել է ընթերցողների սպասարկումը և գրադարանային մնացյալ աշխատանքները: Աշխատակիցները ժամանակավորապես գտնվում են հարկադիր պարապուրդում: Ես համոզված եմ, որ ստեղծված իրավիճակը ժամանակավոր է և չի բերի ընթերցողների հետ կապի խզման: Նախ՝ նրանցից յուրաքանչյուրի մոտ գրադարանից վերցրած գիրք կա և այն պետք է վերադարձնել: Երկրորդ՝ այս օրերին հեռավար կարգով աշխատում ենք նոր գրքեր ընտրելու և ձեռք բերելու ուղղությամբ: Արդեն ունենք ընտրված գրքերի ցանկ «Անտարես» և «Արևիկ» հրատարակչություններից: Առաջիկայում ձեռք բերված նոր գրքերի մասին մեր ընթերցողները կտեղեկանան գրադարանի կայք և ՖԲ էջերից:

 — Ի՞նչ խնդիրների առաջ է կանգնել գրադարանն այս օրերին:

— Խնդիրներ, որպես այդպիսիք, չկան: Սպասում ենք գրադարանի բնականոն աշխատանքի վերսկսմանը:

— Այս պարագայում կարևորվեցին  էլկետրոնային և աուդիո գրքերը:  

— Այո, համացանցի ընձեռած  հնարավորություններից յուրաքանչյուրը կարող է օգտվել և օգտվում է, այդ թվում՝ նաև ես:

 — Գրադարաններն այս առումով որքանո՞վ են զինված, ի՞նչ հնարավորություններ ունեն:

— Գրադարանը ժամանակավորապես չի գործում. «Մնա տանը» կարգախոսը գրադարանի աշխատողներին էլ է վերաբերում:

— Ստեղծված իրավիճակը կարո՞ղ է նոր ծրագրեր, նոր մարտավարություն թելադրել:

— Գրադարանի առաքելությունը ընթերցողի հետ անմիջական կապն է. գիրք տալ-ստանալը այս վիճակում հնարավոր չէ իրականացնել: Համացանցի հնարավորություններից յուրաքանչյուրը օգտվում է անհատապես, այս պարագայում հարկադիր պարապուրդում գտնվող գրադարանի աշխատակցի ներկայությունը դժվար է պատկերացնել: Առանձին ընթերցողներ իրենց հետաքրքրող հարցերի մասին, ինչպես նաև խորհրդատվություն ստանալու համար կապվում են աշխատակիցների հետ ՖԲ նամականիով կամ հեռախոսով:

— Ի՞նչ առաջնահերթ քայեր են իրականացվելու գրադարանում՝ արտակարգ իրավիճակի ավարտից հետո:

— Առաջին հերթին ընթերցողներին պետք է խնդրենք վերադարձնել գրադարանի՝ իրենց մոտ գտնվող գրքերը: Հրատարակչություններից նոր ձեռք բերված գրքերը պետք է անցնեն գրադարանային հաշվառման ու մշակման փուլով, ապա պետք է լուսաբանվեն՝ իրազեկման ու ազդարարման հնարավոր միջոցներով:

Հեռավար զրույցը՝ Տաթև Խաչատրյանի