«Չենք կարող հանրությանն առանց նոր գրքերի թողնել»

«Էդիթ Պրինտ» հրատարակչության առաջիկա ծրագրերի մասին ardi.am-ին մանրամասներ է ներակայացնում հրատարակչության հասարակայնության հետ կապերի պատասխանատու Ռոզա Գրիգորյանը:

«Էդիթ Պրինտ» հրատարակչությունը, չնայած ծանր իրավիճակին, չի կարող հանրությանն առանց նոր գրքերի թողնել: Մեր հրատարակչության նախաձեռնությամբ ապրիլ-մայիս ամիսներին ընթերցողների սեղանին կդրվեն դասական և ժամանակակից հեղինակների բացառիկ նմուշների հայերեն թարգմանությունները:

Մեծանուն բարերարներ Քըրք Քըրքորյանին և Գալուստ Գյուլբենկյանին նվիրված գրքերի լույսընծայումից հետո հաջորդ բարերարը, որի մասին հրատարակչությունը գիրք կներկայացնի, «նավթի արքա» Ալեքսանդր Մանթաշյանցն է: Վերջինս իր ապրած ժամանակում ամենահարուստ մարդկանցից մեկն է համարվել։ 1899 թվականին Մանթաշյանը ստեղծել է «Ալեքսանդր Մանթաշև և Կո» ընկերությունը, որը 20-րդ դարի սկզբին արդյունահանում էր Բաքվի նավթի կեսից ավելին։ Հեղինակը Արմեն Գասպարյանն է:

Հայերեն թարգմանությամբ ընթերցողի դատին կհանձնվի նաև հայտնի գերմանացի գրող Էրիխ Մարիա Ռեմարկի «Սև կոթողը»: «Սև կոթողը» գրվել է 1956 թվականին: Վեպը ներկայացնում է Գերմանիան 1920-ական թվականների սկզբին: Այդ ժամանակաշրջանը հայտնի էր հիպերինֆլացիայով և աճող նացիոնալիզմով: Գրքի գլխավոր հերոսը՝ Լյուդվիգը, իր ընկերներից շատերի պես, Առաջին աշխարհամարտի վետերաններից է: Չնայած նա իր ամբողջ կյանքում ձգտել է բանաստեղծ դառնալ, այժմ աշխատում է իր ընկերոջ՝ Ջորջի փոքր կազմակերպությունում, որը զբաղվում է գերեզմանաքարեր մշակելով: Նա փորձում է հավելյալ գումար վաստակել՝ որպես մասնավոր ուսուցիչ աշխատելով գրախանութի սեփականատիրոջ տղայի հետ, ինչպես նաև տեղի եկեղեցում երգեհոն է նվագում:

2013 թվականի Financial Times-ի և Goldman Sachs-ի «Տարվա լավագույն բիզնես գիրք» մրցանակի դափնեկիր Բրեդ Սթոունի «Ամեն ինչի խանութը» գիրքը նույնպես հայերեն թարգմանությամբ կդրվի ընթերցողի սեղանին: Այն Amazon-ի ստեղծման պատմությունն է, պատմություն նրա հիմնադրի՝ Forbes-ի վարկածով՝ աշխարհի ամենահարուստ մարդ Ջեֆ Բեյզոսի մասին:

Այն 2013 թվականի լավագույն գիրք է ճանաչվել Washington Post-ի, Forbes-ի, The New Republic-ի, The Economist-ի, Bloomberg-ի և Gizmodo-ի կողմից և ընդգրկվել է Nieman Reports-ի 2013 թվականի հետախուզական լրագրողական գրքերի լավագույն տասնյակում: «Ջեֆ Բեյզոսը մեր դարաշրջանի ամենահեռատես, ամենակենտրոնացած և ամենահամառ նորարարներից է, որը՝ Սթիվ Ջոբսի պես, ոլորտներ է կերպափոխում և հորինում: Բրեդ Սթոունին հաջողվում է հագեցած ու գրավիչ շարադրանքով թղթին զետեղել նրա կիրքն ու հանճարը»,-այս գործի մասին ասել է «Սթիվ Ջոբս» գրքի հեղինակ Ուոլթեր Այզեքսոնը:

«Մանրակրկտորեն հետազոտված այս գրքում բազում մարգարիտներ կան բոլոր նրանց համար, ովքեր անտարբեր չեն Amazon-ի, Ջեֆ Բեյզոսի, ձեռներեցության, առաջնորդության հանդեպ կամ այն խենթության, որի շնորհիվ երկու տասնամյակից էլ պակաս ժամանակում մի ընկերություն կառուցվեց, որն այժմ մոտ 90000 աշխատակից ունի և անցյալ տարի գրեթե ամեն տեսակի ապրանք է վաճառել՝ 61 մլրդ դոլար ընդհանուր արժողությամբ»,-նշել է Washington Times-ի Բեթանի ՄքԼինը:

Նշեմ նաև, որ վերջերս մեր հրատարակչությունը լույս էր ընծայել ժամանակակից գրող, պահանջված հեղինակ Դավիթ Սամվելյանի «Զգուշացեք, դռները չեն փակվում» վիպակը, որը ապրիլին կներկայացնենք նոր՝ երկրորդ հրատարակությամբ: Ստեղծագործությունը, գրողի բնորոշմամբ, պատմություն է սիրո և վարակի ու սիրով վարակված լինելու մասին:

Վիպակը, ըստ էության, իր մեջ բազում խորհրդանշական տարրեր է պարունակում: Նախ՝ բաղկացած է 19 գլխից, ինչը վիրուսի անվանման՝ COVID-19-ի հետ է կապված: Գլուխներից միայն վերջինը չունի վերնագիր է, բայց բոլոր հարցերի պատասխաններն ընթերցողը կգտնի հենց այդ գլխում: Գրքի հերոսները հայ և իտալացի երիտասարդներ են, դեպքերը ծավալվում են երեք պետություններում՝ Հայաստան, Չինաստան, Իտալիա: Վիպակում հեղինակը ներկայացրել է տարբեր ազգերի ազգային առանձնահատկությունները, ժամանակակից աշխարհի իրավիճակը, դրական ու բացասական կողմերը: Ընթերցողը կգտնի իտալական, հայկական, չինական միջավայրերի նկարագրություններ:

Նախագիծը՝ Արմինե Սարգսյանի