Աճուրդի գներ, որոնք ձեզ կզարմացնեն

Մի քանի՝ համեմատաբար նորահայտ նկարիչների աշխատանքներն ասես մեկ գիշերում կտրուկ թանկացան։ 

Վաճառքի անսպասելի բարձր գները ոգևորություն են առաջացնում արվեստի աճուրդներում։ Չնայած որ իրադարձությունները հիմնականում տեղափոխվել են առցանց հարթակ, այդուհանդերձ դեռ շարունակում են հուզել արվեստի աշխարհը։ 

Վերջին մի քանի տարում էներգետիկ դաշտը պայմանավորում են մի խումբ քառասնամյա կամ ավելի երիտասարդ  նկարիչներ, որոնց աշխատանքները մեծ աճուրդի տներում առաջին անգամ հայտնվելուց հետո ունենում են անհավանական բարձր գին։
Օրինակ՝ շվեցարացի Նիկոլաս Փարթին հայտնի էր իր սյուրռեալիզմի տարրեր պարունակող բնապատկերներով և նատյուրմորտներով, երբ 2018-ի հունիսին առաջին անգամ հայտնվեց աճուրդում։ Նրա՝ թղթի վրա մատիտով  նկարած «Նատյուրմորտ համար/№/ 97» նկարը (2012) Լոնդոնի «Քրիստիսում» (Christie’s) վաճառվեց 11128 դոլար տպավորիչ գնով։

Մեկ ու կես տարի անց՝ 2019-ի նոյեմբերին, նրա՝ 2016-ին նկարած պաստելային «Քարերի» գինը Հոնկոնգի «Քրիստիսում» հասավ 1,1 միլիոն դոլարի։

Դեյվիդ Գալպերինի խոսքով՝ այժմ տարբերությունն այն է, որ մեծ գումար ունեցող գնորդները շատացել են, և արվեստի շուկան շատ ավելի մեծ է։ 

Արվեստի խորհրդատու Լիզ Կլյայնը նկատում է, որ ռեկորդ սահմանելու համար բավական է աճուրդի երկու մասնակից, որոնք միմյանց դեմ են աշխատում, իսկ աճուրդի շուկան, ինչպես հայտնի է, անկանխատեսելի է։ Այս գործում նշանակություն ունի նաև դեֆիցիտը։ Օրինակ՝ նկարչի մահից հետո նյութի քանակը սահմանափակվում է։ Եվ չկա շուկայի տարբեր բռնկումները  բացատրելու ընդհանրական մոդել։ 

«Աճուրդների համակարգը շատ ժողովրդավարական  է. եթե դուք գումար ունեք, կարող եք վճարել՝ խաղալու համար»,- ասել է  Լիզ Կլյայնը՝ նշելով հակադրությունը պատկերասրահների հետ, որտեղ նկարիչները հաջողության հասնելու համար որոշակի ճանապարհ են անցնում։ 

«Կան մի խումբ կոլեկցիոներներ, որոնք ուշադրություն են դարձնում աշխատանքին միայն այն դեպքում, եթե այն ունի որոշակի արժեք,- ասել է «Ֆիլիպս» աճուրդային տան փոխնախագահ Ժան-Պոլ էնգելենը։- Մարդիկ չեն նկատի Ջուլի Կերտիսին, երբ այն արժե 5000 դոլար։ Բայց կնկատեն, երբ արժենա 100 000»։

Բայց բարձր գները բերում են նաև դժվարություններ։ «Ձեր ուժը ձեր թուլությունն է,- ասում է Էնգլենը:- Հիանալի է, որ ձեր աշխատանքն արժեքավոր է, բայց և կա վտանգի գործոնը․ եթե դուք այս ամսվա շունչն եք, հնարավոր է՝ երկու ամիս անց այլևս չվերադառնաք այդ կարգավիճակին»։

Անգլերենից թարգմանեց Իսրայել Ասրյանը
Նյութի աղբյուր՝ nytimes.com