Վերլուծի՛ր ու տե՛ս, թե ո՛ր ժողովրդի գրողն ես դու

Հայացք պատերազմին․ Ալիս Հովհաննիսյան (գրող, ՀԳՄ Արձակի բաժնի վարիչ)

Այսօր անցել է առաջին օրերի խուճապս: Գիշերային տագնապներս մարեցին, և ԱՍՏՎԱԾԱՅԻՆ ձայնը ինձ հիշեցրեց օրվա ընթացքում իմ տեսածն ու լսածը: Ասաց. «Հիմա, երբ մի քիչ անցել է բազմաթիվ հաղորդագրությունների, լուրերի, հաղորդումները հապճեպ դասդասելու ժամը, գիշերային այս լռության մեջ վերլուծի՛ր ու տե՛ս, թե ի՜նչ ազգի զավակ ես, ո՛ր ժողովրդի գրողն ես դու»: 

Վերլուծեցի: Մեկ առ մեկ աչքիս առջևով անցան կամավոր զինվորագրվողների, փոխներարկման համար արյուն հանձնողների, աշարհազորայինների հերթերը, Սոլովյովի և  Օլգայի հաղորդումները, Ալիևի խոնարհված հայացքը, քանի որ անհնար է այդքան շատ, մեկը մեկից մեծ ստեր խոսել՝ տեսախցիկի աչքերին նայելով, մեր վարչապետի տառապանքի ու հոգնության մեջ քանի օր ու գիշերներից հետո արտասանած պատասխանները, Էրդողանի ու նրա արբանյակների հնչեցրած չար վիշապի սպառնալիքները, աշխարհի ամենատարբեր անկյուններից եկող՝ «Ի՞նչ անենք, ո՞նց անենք», «Էլ ի՞նչ անենք» հեռախոսազանգերը: Եվ 21-րդ Սաղմոսն էլ կարդալուց հետո խաղաղություն իջավ վրաս, ու ես ինձ հպարտ զգացի այնքան, որքան երբևէ չեմ զգացել իմ կյանքի ընթացքում: Ուրեմն, ոչ թե իմ ժողովրդին է պետք գրողի կոչը, հորդորը, ոգեշնչումը, այլ ժողովուրդն է իր գրողին հորդորում գոտեպնդվել ու մի պահ անգամ չկորցնել երջանիկ ապագայի երազը իրականություն տեսնելու հավատը… 

«ՀԱՂԹԵԼՈՒ ԵՆՔ»,- ասում է այս պահին ամբողջ հայությունը՝ մեկ մարդ ու մեկ սիրտ դարձած…  «Հաղթելու ենք»,- ասում է իր որդուն դեպի Արցախ ճամփող մայրը…

Ժողովուրդը իմաստուն է, իսկ մեր ժողովուրդը նաև իր մեջ լավատեսության, հույսի, հավատի ու սիրո այնքան վիթխարի կուտակումներ ունի, որ կբավարարի այս մի Սարդարապատն էլ պատվով ու հաղթանակով ավարտելու… 

Իսկ Սաղմոսը, որ բացվեց գիշերային լռության մեջ, 21-ն էր. վերնագրված է՝ «Փառք հաղթանակի համար»:

Ամբողջ Սաղմոսը մատնանշելուց հետո՝ մեջբերեմ հետևյալ համարները.

8. Քո ձեռքը գտնելու է Քո բոլոր թշնամիներին, Քո աջ ձեռքն ի հայտ է բերելու բոլոր Քեզ ատողներին:

9. Նրանց կրակի ես նմանեցնելու Քո բարկության պահին. ՏԵՐՆ Իր զայրույթով կլանելու է նրանց, ու կրակն է լափելու նրանց:

10. Նրանց պտուղը վերացնելու ես երկրի երեսից ու նրանց սերունդը՝ մարդկանց որդիների միջից:

11. Քանի որ Քո դեմ չարություն ծրագրեցին, նենգություն խորհեցին, որը չեն կարողանալու իրագործել:  

12. Ահա թե ինչու ես Դու նրանց թիկունքով շրջելու, երբ Քո աղեղի լարերը նրանց դեմքին ուղղես:

13. Ով ՏԵ՛Ր, փառավորվի՛ր Քո զորությամբ, մենք երգելու ու փառաբանելու ենք ՔՈ հզորությունը:

Ardi.am