Հոկտեմբերի 7- ին՝ ժամը 20-ին, «Երևանյան հեռանկարներ» 20-րդ միջազգային երաժշտական փառատոնի շրջանակում, «Արամ Խաչատրյան» համերգասրահում լեգենդար ջութակահար, կրկնակի Գրեմմիի մրցանակակիր Պինխաս Ցուկերմանի կատարմամբ կհնչի երկու գլուխգործոց՝ Բեթհովենի ջութակի կոնցերտը և Բախի կրկնակի կոնցերտը` երկու ջութակների համար: Հայաստանի ազգային ֆիլհարմոնիկ նվագախումբը կղեկավարի դիրիժոր Էդուարդ Թոփչյանը: Համերգին մասնակցում է երիտասարդ տաղանդաշատ ջութակահար, Մենուհինի անվան մրցույթի առաջին մրցանակակիր Դիանա Ադամյանը: Փառատոնին աջակցում է «Իմ քայլը» բարեգարծական հիմնադրամը:
«Ցուկերմանը կարծես մի հավերժ երիտասարդ վիրտուոզ լինի՝ արտահայտչականորեն ճարպիկ, վարակիչ կերպով երաժշտական, տեխնիկապես անբասիր, թեթևասահ։ Ինչպես միշտ, նրա երաժշտական ընկերակցության մեջ լինելը մեծ ուրախություն է» (Լոս Անջելես թայմս):
Արդեն շուրջ կես դար Պինխաս Ցուկերմանը համաշխարհային երաժշտության ֆենոմենն է։ Նրա երաժշտական հանճարը, վիթխարի տեխնիկան և անսասան գեղարվեստական չափանիշները հրաշալիք են ունկնդիրների ու քննադատների համար: Նրա անունը հավասարապես հարգանք է վայելում որպես ջութակահար, ալտահար, դիրիժոր, մանկավարժ և կամերային երաժիշտ:
Ցուկերմանը Լոնդոնի Թագավորական ֆիլհարմոնիկ նվագախմբի գլխավոր հրավիրյալ դիրիժորն է և Կանադայի արվեստների կենտրոնի նվագախմբի պատվավոր դիրիժորը: 2017-ից Ցուկերմանը Նյու Ջերսիի սիմֆոնիկ նվագախմբի «Ձմեռային փառատոնի» և կրթական ծրագրի գեղարվեստական ղեկավար է: Իբրև մենակատար և դիրիժոր՝ նա հանդես է գալիս Բեռլինի, Իսրայելի, Տոկիոյի, Լոս Անջելեսի ֆիլհարոմնիկ նվագախմբերի, Բոստոնի, Մոնրեալի, Քլիվլենդի, Պիտսբուրգի, Սիդնեյի սիմֆոնիկ նվագախմբերի հետ, Կամերատա Զալցբուրգի, Կորեական կամերային նվագախմբի, Օրֆեոս նվագախմբի և մեր օրերի ականավոր մենակատարների հետ` կամերային անսամբլով:
Պինխաս Ցուկերմանը ծնվել է 1948-ին Թել-Ավիվում: ԱՄՆ է մեկնել 1962-ին, ուսանել է Ջուլիարդի դպրոցում՝ անվանի ուսուցիչ Իվան Գալամյանի մոտ։ Իբրև մենակատար՝ նվագել է մոլորակի ամենահեղինակավոր նվագախմբերի հետ` անվանի դիրիժորների ղեկավարությամբ: Վերջին տասնամյակում նա հավասարապես ելույթներ է ունենում որպես դիրիժոր՝ ղեկավարելով աշխարհի մի շարք առաջատար նվագախմբեր: Պինխաս Ցուկերմանի լայնածավալ դիսկոգրաֆիան ընդգրկում է ավելի քան 100 անուն: Նա 21 անգամ եղել է Գրեմմիի մրցանակի թեկնածու, երկու անգամ՝ մրցանակակիր: Ցուկերման հանճարեղ երաժիշտը և մեծ անհատականությունը ոգեշնչման աղբյուր է երիտասարդ արվեստագետների համար: Նա Մանհեթենի երաժշտական ակադեմիայում ղեկավարում է «Պինխաս Ցուկերման» կատարողական ծրագիրը: Կանադայում հիմնադրել է նվագախմբային հետազոտությունների NAC և Ամառային երաժշտական ինստիտուտները. վերջինս ծրագրեր է իրականացնում երիտասարդ արվեստագետների, դիրիժորների և ստեղծագործողների համար։
Ardi.am
No Comments