Արմինե Սարգսյան Արցախ ՄարզաԴիտակ

Հերոսական մեր երգերը կհնչեն ընդլայնված սահմանագծում

06.10.2020

Հայ-ադրբեջանական նոր պատերազմի նախօրեին Տավուշում տոն էր։ Սեպտեմբերի 25-26-ին Տավուշի սահմանապահ 14 համայնքներում` Բաղանիս, Կոթի, Բերդավան, Ոսկեպար, Բերքաբեր, Վազաշեն, Պառավաքար, Այգեպար, Ներքին Կարմիրաղբյուր, Արծվաբերդ, Մովսես, Այգեպար, Չինարի, Բարեկամավան և Բերդ քաղաքում  հնչել է ազգային երգն  ու պարը։ Մեկնարկել էր Հայաստանի ավանդական երգի-պարի «Գութան» ամենամյա փառատոնը:

«Գութան» փառատոնի հիմնադիր-ղեկավար,  հայ ժողովրդական երգերի մեկնաբան, Հայաստանի վաստակավոր արտիստ Արսեն Գրիգորյանը (Մրոն) առաջնագծում է, նրա հետ կապ հաստատել չհաջողվեց։

Զրուցեցինք փառատոնի համակարգող  Գայանե  Ասլանյանի հետ,  որի  ձևակերպմամբ՝   «Գութանի» մասնակից  ազգագրական խմբերը  ելույթ են  ունեցել  Տավուշի  14  սահմանապահ համայնքում՝  մեկ խումբ՝ մեկ համայնք ձևաչափով, սահմանագծի ողջ երկայնքով մի քանի  ժամ  շարունակ թնդացել են հայրենասիրական, ռազմահայրենասիրական երգն ու պարը: Այնուհետև՝ սեպտեմբերի 26-ի  երեկոյան,  բոլոր խմբերը միասին  ելույթ են  ունեցել Բերդում։  

Ինչպես ամեն տարի՝ փառատոնը սկսվել է բոլոր խմբերի միասնական  «Բարի լուսո» և «Հայե՛ր, միացե՛ք»  երգերի  կատարմամբ: Փառատոնի հիմնադիր-ղեկավար Արսեն Գրիգորյանի բացման խոսքին հաջորդել են Տավուշի թեմի առաջնորդ Բագրատ Սրբազանի օրհնության կարգն ու Տավուշի մարզպետ Հայկ Չոբանյանի ողջույնի խոսքը։  

Փառատոնին մասնակցել են  «Ակունք», «Սասնա Ծռեր», «Վան», «Արդվին», «Մասունք, «Նուբար», «Վերադարձ»,  «Գորանի», «Վարք Հայոց», «Սեբաստացիներ», «Մարաթուկ», «Արեգ» , «Մարաթուկցիներ»  և  «Տավրոս»  ավանդական երգի ու պարի խմբերը`  հայրենասիրական, ռազմահայրենասիրական  երգերով ու պարերով: Գալա համերգն ավարտվել է կրկին ավանդույթ դարձած՝ միասնական «Մշու Խըռ», «Յարխուշտա» պարերով։

Գայանեն նշեց, որ հրապարակը լեփ-լեցուն էր․ «Նույնիսկ ժամանակ առ ժամանակ տեղացող անձրևը չխանգարեց: Հանդիսատեսը և՛ Տավուշից էր, և՛ Երևանից, և՛ ՀՀ տարբեր մարզերից։ Հրաշալի երեկո էր՝ բարձր տրամադրությամբ, մարտական ոգով: Տավուշցիների ոգին շատ հզոր է. մենք նրանց մարտական էներգիայով լիցքավորվեցինք, նրանք՝ մեր ազգային երգ ու պարով:  «Գութանի» հանդիսատեսը  զուտ հանդիսատես չէ, «Գութանն» էլ՝ զուտ համերգ: Հանդիսատեսը դառնում է այս փառատոնի մասնակիցը՝ իր միասնական երգ ու պարով։ «Գութանը» միասնության խորհրդանիշ է»։ 

Մեր զրուցակիցը նաև ասաց, որ Տավուշի 100 բնակիչ ունեցող գյուղից խնդրել են այցելել իրենց, ասել,  որ կարող են ոտքով էլ գնալ, մասնակցել Բերդում կամ մեկ այլ  գյուղում տեղի ունեցող համերգին,  բայց ուզում են, որ իրենց փոքրիկ գյուղում էլ հնչեն ազգային, հերոսական  երգերն  ու պարերը։  Չի անտեսվել խնդրանքը, ինչին հաջոդրել են շնորհակալական նամակները։  

Տավուշից  վերադարձել են սեպտեմբերի 27-ին՝  լուսադեմին։  Երկու ժամ անց հայտարարվել է հակառակորդի սանձազերծած պատերազմի մասին։ 

«Գութանը» շարունակվելու է։  Մինչև տարեվերջ համերգներ  կլինեն Կոտայքում, Արատարում և Երևանի բոլոր վարչական շրջաններում։ 

Սակայն այս օրերին փառատոնի մասնակից խմբերի  միասնությունը  ոչ   թե ռազմահայրենասիրական երգ ու պարի շուրջ է, այլ  հանուն հայրենիքի պաշտպանության։ Գայանեն տեղեկացրեց, որ ազգագրական խմբերի տղաների մեծ մասն առաջնագծում են, վստահեցնելով, որ շուտով այս ամենը հաղթական ավարտ կունենա,  տղաները կրկին կհամախմբվեն ազգային երգ ու պարի շուրջ, և  հայրենասիրական, հերոսական մեր երգերը կհնչեն  ընդլայնված սահմանագծում։

Արմինե Սարգսյան
Լուսանկարները՝ «Գութանի» արխիվից


No Comments

Leave a Reply