Հին ու նոր Գյումրի թատերախումբը կրկին բարեգործական ներկայացումներով Հայաստանի սահմանամերձ համայնքներում է։ 12 տարի առաջ, ՀՀ վաստակավոր արտիստ Ռաֆայել Խառատյանի նախաձեռնությամբ ձևավորվեց «Հին ու նոր Գյումրին», թատերախումբը համալրեցին սիրված և ճանաչված, վաստակաշատ դերասաններ, խումբ ներգրավվեցին նաև երգիչ-կատարողներ։ Իրական կյանքից վերցված, զվարճալի և ուսուցողական մանրապատում-ներկայացումները շատ արագ ընդունվեցին ու սիրվեցին հանդիսատեսի կողմից։ Սկսեցին իրար հաջորդել բազմաթիվ հյուրախաղեր՝ Հայաստանում և Արցախում։ Խումբը մի կուռ ընտանիք դարձավ՝ նպատակ դնելով իր առաջ ժպիտ և ուրախություն պարգևել հանդիսատեսին։
«Հին ու նոր Գյումրի» խմբի այցելությունները մարզեր և Արցախ աշխարհ, մշտական բնույթ էր կրում։ Արտիստները կարոտով ու հուզված են հիշում, թե ինչ սիրով ու նվիրումով էին Արցախում տեղակայված զորամասերում, զինվորների և սպայական անձնակազմի համար խաղում բեմում։ Շուշիի մշակույթի տան բեմը ամենասիրելիներից էր դարձել նրանց համար։
Համավարակն ու չարաբաստիկ պատերազմը մեկ տարուց ավելի է, ինչ լռեցրել էր թատերախմբին, սակայն արվեստագետը բեմին տված երդում ունի՝ ծառայել ժողովրդին, խաղալ ու թատրոն բերել մարդկանց, ինչ էլ որ պատահի։
2021 թվականի օգոստոսի մեկից թատերախումբը կրկին բեմում է։ Խմբի ղեկավար Ռաֆայել Խառատյանը նշում է, որ իրենք պարզապես իրավունք չունեն լռելու, թատրոնը սրբավայր է, որտեղ եկողը մաքրագործվում ու վերաիմաստավորում է կյանքը, առաջ է նայում ու լցվում լավատեսությամբ։ Բարեգործական ներկայացումների ծախսերը հոգալու հարցում իր մեծ դերն է ունեցել ծնունդով Գյումրեցի, «Ալկալիդա տուրիզմ» տուրիստական գործակալության հիմնադիր և սեփականատեր Սիրակ Մուրադյանը, ով չնայած ապրում ու աշխատում է արտասահմանում, բայց սիրով հոգաց շրջագայությունների ծախսերը։
Օգոստոսի 1-ին թատերախումբը ելույթ ունեցավ սահմանամերձ Բերդ քաղաքում, որտեղ հոգսաշատ ու ապրելու պայքար մղող հանդիսատեսը մի փոքր կտրվեց առօրյա հոգսերից, ժպտաց ու կյանքին նայեց նոր գույներով։ Հաջորդ ներկայացումը Իջևան քաղաքում էր, զինվորների ու հանդիսատեսի համար օրն անցավ ուրախ, այստեղ նույնպես հանդիսատեսը ցանկություն հայտնեց կրկին հյուրնկալել սիրված դերասաններին։ Մեկօրյա դադարից հետո թատերախումբն ուղղություն վերցրեց դեպի Սպիտակ քաղաք, ուրախ ներկայացումն ու երաժշտական կատարումները ծիծաղ ու բարձր տրամադրություն պարգևեցին հանդիսատեսին։ Ներկայացումների շարքը եզրափակվեց Արարատ քաղաքում, հանդիսատեսի ջերմ ընդունելությունը հուշում է, որ ներկայացումները շարունակություն են պահանջում։
No Comments