2022 թվականի նոյեմբերի 24-ին`ժամը 18:30-ին, Գաֆէսճեան արվեստի կենտրոնի (ԳԱԿ) «Ցուցասրահ Մեկում» կկայանա «ԿարենՊետրոսյան.սկիզբ, վերջ, սկիզբ» ցուցադրության հանդիսավոր բացումը (մուտքը հրավիրատոմսերով)։
Կանադաբնակ հայազգի արվեստագետ Կարեն Պետրոսյանն (ծնվ. 1952 թ.) իր արվեստում արդեն մի քանի տասնամյակ ուսումնասիրում է մարդու և բնության հարաբերությունները տարբեր հարթություններում՝ կենսաբանական, փիլիսոփայական, տիեզերական, մետաֆիզիկական և այլն։ Այս ամենով հանդերձ, մարդը նրա ստեղծագործություններում կենտրոնական դեր է խաղում, և նրա աշխատանքները կառուցված են մարդու շուրջ։ Մարդը և բնությունը նրա արվեստում չեն դիտարկվում առանձին-առանձին, որոշակի վակուումի մեջ, այլ հենց միմյանց հետ հարաբերության խոսույթում են գտնվում։
Կարեն Պետրոսյանի «սկիզբ, վերջ, սկիզբ» ցուցադրությունը ԳԱԿ-ի «Ցուցասրահ Մեկ» և «Արծիվ» սրահներում այս բազմաշերտ թեմային ուղղակի առնչություն ունեցող ստեղծագործությունների ընտրանի է, այդ թվում աշխատանքների, որոնք արվել են հատուկ այս ցուցահանդեսի համար։ Մարդը Կարեն Պետրոսյանի կտավներում և քանդակներում ճամփորդ է, ով անցնում է ոչ թե իր ճանապարհը, այլ ավելի լայն, հավաքական իմաստով, քայլում է մարդկության կրկնվող ճանապարհով։
«Կարեն Պետրոսյան. սկիզբ, վերջ, սկիզբ» ցուցադրությունը հնարավորություն է տալիս մտածելու ոչ միայն մարդու և բնության հարաբերությունների մասին այսօր, այլև խորհելու մարդու ապագայի մասին այդ հարաբերություններում»,- նշել է Գաֆէսճեան արվեստի կենտրոնի գործադիր տնօրեն Վահագն Մարաբյանը։
Ցուցադրությունը կգործի հանրության համար Կենտրոնի «Ցուցասրահ Մեկ» և «Արծիվ» սրահներում 2022 թվականի նոյեմբերի 25-ից մինչև 2023 թվականիմարտի12-ը։ Մուտքն ազատ է։
No Comments