Աշխարհահռչակ հայազգի դիրիժոր, Նյու Յորքի քաղաքային օպերայի երաժշտական տնօրեն և գլխավոր դիրիժոր Կոնստանտին Օրբելյանի ղեկավարությամբ` Կաունասի սիմֆոնիկ նվագախումբը ձայնագրել է իր 20-րդ հոբելյանական ալբոմը։ «Delos Music» նշանավոր ստուդիայում ձայնագրված ալբոմը ներառում է տենորի համար գրված 13 նշանավոր արիաներ՝ հայ տաղանդաշատ օպերային երգիչ Լիպարիտ Ավետիսյանի կատարմամբ։ Սա Լ. Ավետիսյանի առաջին անհատական ալբոմն է։
Լիպարիտ Ավետիսյանը նշեց, որ ձայնագրության մտահղացումը Կոնստանտին Օրբելյաննին է․ «Մենք պլանավորել էիք դեռ չորս տարի առաջ այն իրագործել, բայց հայտնի պատճառներով՝ պատերազմ, համավարակ, այնուհետև իմ զբաղվածության պատճառով, չէր հաջողվում հանդիպել Կաունասում և իրականացնել ձայնագրությունը։ Այս տարի բարեբախտաբար հաջողվեց։ Ձայնագրության համար հատկացրել էինք չորս օր, սակայն ավարտեցինք երեք օրում։ Ձայնագրել ենք տենորի համար գրված 13 հայտնի արիաներ, գրեթե բոլոր արիաներն էլ իմ խաղացանկից են, այսինքն` բոլոր այդ դերերով ես ներկայանում եմ աշխարհի տարբեր բեմերում: Հուսով եմ, որ առաջիկայում մենք նոր ու հետաքրքիր համատեղ նախագծերով հանդես կգանք»։
Լիպարիտ Ավետիսյանը սովորել է Մոսկվայի Պ. Չայկովսկու անվան պետական կոնսերվատորիայում Բ.Կուդրյավցևի դասարանում: Այնուհետև ուսումը շարունակել է Երևանի Կոմիտասի անվան պետական կոնսերվատորիայում` պրոֆեսոր Ռաֆայել Հակոբյանցի դասարանում: Ներկայումս արտիստը հանդես է գալիս աշխարհի հեղինակավոր օպերային թատրոններում։ Կաունասի սիմֆոնիկ նվագախմբի մասնակցությամբ (դիրիժոր Կոնստանտին Օրբելյան) տեղի է ունեցել նաև Լիպարիտ Ավետիսյանի և ամերիկացի օպերային երգչուհի Քրիստին Սամփսոնի համատեղ համերգը։ Համերգային երեկոն արժանացել է հանդիսատեսի բարձր գնահատականին։
No Comments