Սեպտեմբերի 26-ին Մարիամ և Երանուհի Ասլամազյան քույրերի պատկերասրահում տեղի կունենա պատկերասրահի խանութի բացումը։ Թանգարանային խանութի նորարարական այս նախագիծը մարզային արհեստագործներին կապում է տեղական թանգարանների հետ` Հայաստանում թանգարանային խանութների նոր մոդելի փորձարկման նպատակով:
Միջոցառմանը ներկա մարդիկ հնարավորություն կունենան տեղում ձեռք բերելու հայ վարպետների ձեռագործ աշխատանքները, որոնք հատուկ ստեղծվել են թանգարանի հավաքածուների ոգեշնչումից՝ հիմնված գունային երանգների և կտավների թեմատիկայի վրա։ Ներկայացված կլինեն նաև բնօրինակների վերարտադրություններ։
Աշխատանքներ ներկայացնող վարպետներն ինչպես Հայաստանի հինգ մարզերը ներկայացնող (Վայոց ձոր, Սյունիք, Լոռի, Տավուշ և Շիրակ) «Իմ Հայաստան» ծրագրի շահառուներն են, այնպես էլ բաց հայտարարությամբ հրավիրված՝ հանրապետության այլ մարզերի արվեստագետներ և արհեստավորներ։
Մարիամ և Երանուհի Ասլամազյան քույրերի պատկերասրահում ներկայացված է Ասլամազյան քույրերի գեղանկարների, գծանկարների և խեցեգործական աշխատանքների ամենամեծ հավաքածուն՝ թվով 620 բնօրինակ աշխատանք: Այն Հայաստանի միակ թանգարանն է, որը նվիրված է կին արվեստագետներին:
Նախագծի նպատակն է ընդլայնել թանգարանային փորձառությունների առաջարկները և հնարավորություն ընձեռել այցելուներին՝ թանգարանից տուն տանելու ձեռագործ պարագաներ։
Ավելին, խանութը նոր հաճախորդներ գրավելու և թանգարանի եկամուտներն ավելացնելու հնարավորություն է տալիս։ Այն նաև հրաշալի առիթ է՝ թանգարանների և հայ վարպետների միջև փոխշահավետ համագործակցություն հաստատելու համար։
Լուսանկարները տրամադրել են Մարիամ և Երանուհի Ասլամազյան քույրերի պատկերասրահից
No Comments