Ժամանակակից գրող Անի Միրզոյանի «Երևան-Փարիզը միայն չվերթ չէ» գիրքը կդրվի ընթերցողի սեղանին։ Գրքի շնորհանդեսը կանցկացվի հունվարի 29-ին, ժամը 17:00 «Անի Պլազա» հյուրանոցում։ Շնորհանդեսի ընթացքում հեղինակը կներկայացնի իր գիրքը, ինչպես նաև կանդրադառնա նախորդ՝ «Հայը» վեպին։
«Շատ են գրել սիրո մասին, և դեռ ինչքա՜ն կգրեն, կփորձեն բացահայտել այն ուժը, որ տալիս է սերը մարդուն, կամ մեկ այլ դեպքում՝ գուցե խլում եղածը։ Ես ևս փորձ արեցի մտնել այդ աշխարհ, և ծնվեց այս գիրքը։ Սա միայն սիրո պատմություն չէ, այլ ճանապարհ, որում կար ամեն ինչ, հետևաբար նաև սեր, քանի որ ամեն ինչ էլ սեր է․․․ Ամեն ինչում սեր է։ Այս պատմությամբ ես փորձել եմ ցույց տալ, թե ինչպես հասարակությունը կարող է իր ընդհանրական վերաբերմունքի պատճառով ակամայից տապալման տանել խնդիրների մեջ հայտնված մարդուն, և ինչպես է այդ մարդը կանգուն մնում՝ հարվածներ կուլ տալով։ Չի չարանում, չի ատում, մարդ է մնում, և երջանկությունը գտնում է նրան, քանի որ իրական երջանկությունը հենց այդպիսիններն են վաստակում։ Այս պատմության մեջ սերը փոխում է շատերին, օգնում հասկանալ կյանքի նուրբ թելերը, որոնց վրայով քայլում էին նրանք և չէին հասկանում, որ կարելի է նաև վազել, բայց հնարավոր է նաև ընկնել»,-նշում է Անի Միրզոյանը։
Գրքի հերոսներ Տաթևի և Պատրիկի հանդիպումը ճակատագրական էր։ Տաթևի կյանքի հունը փոխվեց, բայց չփոխեց նրան։ Տաթևին հնարավոր չէր փոխել, նրա տեսակը խորն էր, հասուն, լուռ պայքարող, պայքարող ինքն իր հետ և ոչ երբեք ուրիշի, ում թվում է՝ պիտի ատեր: Պատրիկի կյանքում ամեն ինչ նույնը մնաց, մինչև, որ իր կյանք անկոչ հյուրի պես ներխուժեց նա՝ Արամ անունով մի տղա՝ հարազատ մեկը, ով որոշել էր օտար ձևանալ։ Արամին Փարիզում սերը նույնպես խայթեց, բայց իր խայթոցով ապրեցրեց, խլեց հանգստությունը, բայց տվեց իմաստ մի պայքարի, որ երջանկություն է կոչվում։
No Comments