Թատրոն Տաթև Խաչատրյան

Նոր սրահ, նոր ներկայացումներ

09.04.2021

2020-ի մարտի կեսերից Հայաստանում մշակութային դադար էր։ Թատերական կյանքը  առկայծեց տարեվերջին՝ հանուն փոքրիկ հանդիսատեսի։ Գրեթե բոլոր թատրոնները հանդես եկան ամանորյա ներկայացումներով։ 

«Արմենպրես» գործակալության մամուլի սրահում հրավիրված ասուլիսում Հակոբ Պարոնյանի անվան երաժշտական կոմեդիայի պետական թատրոնի տնօրեն Կարո Շահբազյանն  ասաց, որ 2021-ի հունվարից վերսկսել են աշխատանքները։
Թատրոնի խաղացանկում ընդգրկված են ավելի քան 25 ներկայացում։ Հունվարից ներկայացել են 3 առաջնախաղով։ Ընթացքի մեջ են 4 առաջնախաղ։

Կարո Շահբազյան

Համավարակի նահանջի դեպքում կբացեն Երվանդ Ղազանչյանի անվան փոքր թատերասրահը։ Դեռևս 2020-ին էին նախատեսել սրահի բացումը, բայց համավարակով պայմանավորված՝  հետաձգվել էր։ Թատրոնի տնօրենն ընդգծեց, որ տարածքն ամբողջությամբ վերանորոգվել է, ձեռք են բերել նոր գույք, ձայնային, լուսային սարքավորումներ: Ռոդոլֆո Սանտանայի «Հարդասենյակ կանանց համար» ներկայացումը, որի առաջանախաղը կայացել է թատրոնի մեծ բեմում, նախատեսված է այդ թատերասրահի համար։

Ներկայում ընթանում են «Ներոն և Սենեկա» ներկայացման փորձերը՝ ըստ Ռաձինսկու։ Բեմադրական աշխատանքներն իրականացնում է թատրոնի գլխավոր ռեժիսոր Հակոբ Ղազանչյանը: Ներկայացումը նախատեսված է  փոքր թատերասրահի համար։

Դեռ 2020 թվականից սկսվել էին «Բանալի երկուսի համար» ներկայացման փորձերը. բեմադրոթյունն իրականացնում է Անուշ Սարգսյանը: Փորձերը վերսկսվել են։ Առաջիկայում այն ևս կհանձնվի հանդիսատեսի դատին:
 
Կլինեն նաև մանկական ներկայացումներ․ «Սպիտակաձյունիկն ու 7 թզուկները» ստեղծագործությունը բեմադրելու համար հրավիրել են Ստեփանակերտի թատրոնի գեղարվեստական ղեկավար Ռուզան Խաչատրյանին։

Կոմպոզիտոր, դաշնակահար, ՀՀ ժողովրդական արտիստ Մարտին Վարդազարյանը գրում է նոր երաժշտություն՝ Դերենիկ Դեմիրճյանի «Քաջ Նազարը» ներկայացման համար։
Կարո Շահբազյանը նշեց, որ 20-30 տարի առաջ Մարտին Վարդազարյանի հեղինակած երաժշտությամբ «Քաջ Նազարը»  բեմ է բարձրացել Գաբրիել Սունդուկյանի անվան ազգային ակադեմիական թատրոնում։ Սակայն մաեստրոն գրում է նոր երաժշտություն՝ նոր բեմադրության համար։ 
Աշխատատար  ներկայացում է, հարյուրից ավելի մասնակիցներ ունեն՝ դերասանական կազմ, երգչախումբ, մենակատարներ, բալետային խումբ։ Մինչև տարեվերջ կհանձնեն հանդիսատեսի դատին։

Այս տարի  հանդիսատեսի դատին կհանձնեն նաև մյուզիքլային ներկայացում, որն ընդգրկելու է հատվածներ համաշխարհային 19 մյուզիքլներից: Այնպես է արվում աշխատանքը, որ տարբեր ներկայացումներից հատվածները ձուլվեն մեկ ներկայացման մեջ: Փորձերն ընթանում են։ Թատրոնի ողջ անձնակազմը գրեթե ընդգրկված է։

Կարո Շահբազյանը նաև տեղեկացրեց, որ այս տարի արդեն մի քանի ներկայացումներով եղել են Կոտայքի մարզում, ամռանը մի քանի ներկայացումներով կլինեն Սյունիքում՝ Կապանում, Մեղրիում, Քաջարանում, Գորիսում, Սիսիանում և Տավուշի մարզի սահմանամերձ գյուղերում։
Թատրոնի տնօրենը կարևոր է համարում հյուրախաղեր ունենալը սահմանամերձ գյուղերում և քաղաքներում։ 

Տաթև Խաչատրյան
Գլխավոր լուսանկարը՝ թատրոնի ֆեյսբուքյան էջից


No Comments

Leave a Reply