«Թելեթրիփը» համատեղ երևակայության և շնորհի արդյունք է: Այն հորինել են Լիլիթ Հակոբյանը և նրա երկու մանկահասակ դուստրերը՝ Էլզա Պետրոսյանն ու Մայա Պետրոսյանը: Գաղափարը Էլզայինն է, նկարչական ձևավորումը՝ Մայայինը, գիրը՝ Լիլիթինը:
«Թելեթրիփը» հեքիաթ-վեպ է, որն առաջին անգամ հրապարակվել է Ardi.am կայքում:
Պատերազմի դաժանությամբ առլեցուն այս օրերին «Թելեթրիփը» ճեղքեց համընդհանուր խավարի պատնեշն ու լույս աշխարհ եկավ գրքի տեսքով: «Զանգակ» հրատարակչատան այս նվերը չափազանց կարևոր է մանուկ ու մանկության հետ կապը չկորցրած մեծահասակ ընթերցողների համար:
«Միշտ եմ հավատացել, որ գրքերն ունեն ճակատագրեր: «Թելեթրիփը» հաջողակ աստղի տակ է ծնվել: Լույս տեսած թե չէ, մի ամբողջ դասարան այն պիտի բացահայտի»,- ասում է Լիլիթ Հակոբյանը։ Բանն այն է, որ Շիրակացու անվան ճեմարանի ամենակրտսեր սաները ձեռք են բերել գրքի օրինակները և պատրաստվում են հաղորդակից դառնալ բարության ու սիրո շռայլ լիցքերով հագեցած այս հեքիաթին:
Գրքի հետ ծանոթանալու բացառիկ հնարավորություն է դեկտեմբերի 22-ին՝ ժամը 17:00-ին կայանալիք շնորհանդեսը «Գամմա» գրախանութում:
Վստահ ենք, որ ինքնօրինակ այս գիրքը կդառնա բազմաթիվ ընթերցողների սիրելի ուղեկիցը և կօգնի փոքրիշատե վերափոխել մեր իրականությունն ու աշխարհը:
Ardi.am
No Comments