«Կայարան» անունով թատրոնը

«Տոնածառ», «Թռի-վռի մի ճպուռ», «Չարաճճի խոզուկների նոր արկածները»,  «Սեեեր ֆրանսիական ձևով»․․․ Նորաստեղծ «Թատրոն Կայարանը» իր դեռևս փոքր խաղացանկով հասցրել է գրավել հանդիսատեսին, հանդես գալ հյուրախաղով։ «Կայարանի» առաջին կանգառը Արարատի մարզն էր։ Արձագանքը՝ ոգևորիչ։  «Թատրոնի էջում  արարատցիները հիացական մեկնաբանություններ են թողել, խնդրել՝ կրկնել  ներկայացումը։ «Չարաճճի խոզուկների նոր արկածները» ժպիտ և ուրախություն էր պարգևել փոքրիկ հանդիսատեսին։ «Սա մեր առաջին հյուրախաղն էր Արարատում։ Արձագանքից դատելով՝ ներկայացումը կարող ենք համարել ստացված»,- ardi.am-ին պատմում է «Թատրոն Կայարանի» կազմակերպչական գծով փոխտնօրեն Անդի Սողոմոնյանը,  շնորհակալություն  հայտնում Արարատի մշակույթի կենտրոնի տնօրեն Աննա Մխիթարյանին, կազմակերպչական գծով կառավարիչ Հուրի Դավթյանին, համայնքապետ Ասլան Ավետիսյանին և բոլոր այն մարդկանց, ովքեր աջակցել են՝ Արարատում հանդես գալու։ 

«Թատրոն Կայարանը» գործունեությունն սկսել է անցյալ տարվա դեկտեմբերից։  Տնօրենը և պրոդյուսերը Արթուր Պետրոսյանն է, գեղարվեստական ղեկավարը՝ Կարո Քարաջյանը։
Նորաստեղծ թատրոնը գործում է Տիգրան Մեծի 80/1 հասցեում՝ Սասունցի Դավիթ կայարանի հարևանությամբ։  Դահլիճը նախատեսված է 280 հանդիսատեսի համար, հնարավորություն կա ընդյալնելու և ընդունելու 400 հանդիսատեսի։  Հարց է առաջանում՝ գտնվելու վայրո՞վ է պայմանավորված թատրոնի անունը, թե՞ անունն է հարմարեցված գտնվելու վայրին։ Անդի Սողոմոնյանն ասում է, որ թատրոնի անունն ու հասցեն զուգադիպել են, «Կայարանը» ավելի շուտ թատրոնի «կանգառներն» է խորհրդանշում․ երբ մեկնում են հյուրախաղերի, ասում են՝ «Կայարանը» կանգ առավ, ենթադրենք, Արարատում։

Իսկ փոխտնօրենը վստահեցնում է՝  կենտրոնից հեռու լինելը բացարձակ խնդիր չէ, տեղի բնակիչները շատ ակտիվ են, կենտրոնից և այլ թաղամասերից  նույնպես գալիս են, ավելին՝ մարզերից են գալիս, հաճախ խմբերով ՝ դասարանով, մանկապարտեզի կազմով և այլն։ Միևնույն հանդիսատեսը գալիս է երրորդ- չորրորդ անգամ։ 

Բազմաժանր այս թատրոնում միախառնված են ժամանակակից ուղղություններն ու ոճերը։ Կարևորում են ազգային արժեքների պահպանումը։ Ներկայացումները գունեղ են ու հետաքրքիր։ Դերասանները՝ փորձառու։

Հուլիսի 2-ին հանդես են գալու Հրազդանի դրամատիկական թատրոնում, հուլիսի 7-ին՝ Վայքի մշակույթի տանը, հուլիսի 9-ին՝ Գավառի Լևոն Քալանթարի անվան դրամատիկական թատրոնում։ Այնուհետև սպասվում է ևս երկու ներկայացում Երևանում։  

«Երկրորդ թատերաշրջանը կմեկնարկի սեպտեմբերին․ Ղազարոս Աղայանի «Անահիտ» հեքիաթի հիման վրա բեմադրված համանուն ներկայացմամբ կազդարարվի նաև թատրոնի պաշտոնական բացումը»,- ընդգծում է Անդի Սողոմոնյանը։ Հավելում՝ աշնանը Արցախ են մեկնելու, փառատոն է լինելու․․․

Ardi.am