Աշխարհի ամենաանսովոր կամուրջները

Զբոսաշրջիկներն այս կամ այն երկրում ճամփորդելիս՝ առաջին հերթին ուսումնասիրում են մշակութային կենտրոնները, դրանց պատմությունը։ Այս հոդվածում դուք կիմանաք երեք ժամանակակից կամուրջների մասին, որnնք ոչ միայն դարձել են քաղաքների տեսարժան վայրեր, այլև ընդգրկված են առաջնային այցելության ցուցակներում։

Կամուրջ «San Shan» (Երեք սար)․ Չինաստան

2022 թվականին Պեկինում տեղի են ունենալու Ձմեռային օլիմպիական խաղերը։ Քաղաքի կենտրոնական մասում ձյան սակավության պատճառով որոշ մրցույթներ կանցկացվեն հյուսիս-արևմտյան շրջանում՝ Չժանցզյակոույում։ Շրջանները միացնող հին ճանապարհը 203 կմ էր։ Դրա համար որոշվեց կառուցել նորը, այդ թվում՝ «San Shan» կամուրջը։
Կառուցվածքը նախագծելիս՝ ճարտարապետները ոգեշնչվել են օլիմպիական օղակներից,  շրջակա լեռներից և ԴՆԹ-ի պարույրից։ Կամուրջը պահում են վեց օղակներ, որոնք միանում են միմյանց՝ սարեր հիշեցնելով։ «Լեռնագագաթների» բարձրությունը՝ 92 մետր է, կամուրջի երկարությունը՝ 452 մետր։ 

Կամուրջ «Infinity» (Անվերջություն)․ Անգլիա

Անգլիական Ստոկտոն-օն-Թիս քաղաքում գտնվող նոր կամուրջը նախատեսված է հետիոտների և հեծանվորդների համար։ Այն միացնում է գետի հյուսիսային ափին գտնվող այգին՝ հարավային հատվածի համալսարանի ու բիզնես-պարկի հետ։ Տեսեք, թե ինչ ներդաշնակ է հավերժության նշանը՝ առավոտյան քաղաքի լռության ու հանգստության հետ։
180 մետրանոց կամուրջի անսովոր լուսավորությունը դրա գլխավոր տեսարժանությունն է։ Հատուկ լուսարձակները կամրջի կամարներն այնպես են լուսավորում, որ օրվա մութ ժամերին դրանք արտացոլվում են ջրում ու «հավերժության» նշանի նմանվում։ Կապույտ գիծը, որը «հավերժությունը» երկու մասի է բաժանում, հետիոտնային գոտին է։ Սրանով լույսի խաղը չի ավարտվում։ Ամբողջ ճանապարհը պատված է սպիտակ և կապույտ լուսադիոդներով։ Այն հատվածը, որի վրա մարդը կանգնում է, սպիտակ լույս է արձակում, իսկ այն հետագիծը, որը մարդն արդեն անցել է՝ լուսավորվում է կապույտով։

Կամուրջ «Round» (Կլոր)․ Ուրուգվայ

Կլոր կամուրջը նոր ուրուգվայական ափեզրով անցնող և մի քանի առողջարանային քաղաքներ միացնող ճանապարհի մասն է։ Արագության նվազեցման նշան դնելու փոխարեն՝ ճարտարապետ Ռաֆայել Վինոլին առաջարկեց կառուցել կամուրջ, որը բնական կերպով կնվազեցնի ավտոմեքենաների արագությունը։ Բացի այդ, ուղևորները տեսարանը վայելելու համար մի փոքր ավելի շատ ժամանակ կունենան։ Երբեմնի հանգիստ վայրը կամուրջի կառուցումից հետո աշխուժացել է։ Այստեղ են գալիս ուեյքբորդինգով զբաղվողները, որպեսզի տպավորիչ տեսանյութեր նկարեն, բայդարկաներով զբոսաշրջիկների համար կամուրջը հավաքատեղի է դարձել, տեղի ձկնորսներն այստեղից ձուկ են որսում, իսկ գիշերը մոտակայքում դիսկոտեկ է կազմակերպվում։ 

Շինարարությունից առաջ Վինոլին հայտարարեց, որ կամուրջը առավելագույնս էկոլոգիապես ճիշտ է նախագծված և ազդեցություն չի ունենա տեղի զգայուն էկոհամակարգի վրա։ Շուտով պարզվեց, որ համեմատաբար փոքր կառույցի վրա կծախսեն 450 տոննա պողպատ, 40000 մետր մալուխներ և 3500 խորանարդ մետր բետոն։ Այս նորությունը բողոքի ակցիաներ առաջացրեց, սակայն շինարարությունը չդադարեցվեց։

Շարունակելի
Փոխադրեց Իսրայել Ասրյանը
Աղբյուր՝ losko.ru