Աբելյանցիների նոր նախագծերը

Վանաձորի Հովհաննես Աբելյանի անվան դրամատիկական թատրոնի «Թատրոնն էկրանին» նախագծի շրջանակում ստեղծվել են 15 կարճամետրաժ վավերագրական-խաղարկային ֆիլմ։ Հեռարձակվելու են հունվարի 31-ից՝  թատրոնի YouTube-յան ալիքով և «Ֆորտունա» հեռուստաընկերությամբ: Թատրոնի լրատվության և հասարակայնության հետ կապերի պատասխանատու Գոռ Փելեշյանը չի բացառում, որ առաջարկեն նաև այլ հեռուստաընկերությունների։

«15 ֆիլմը ներկայացնում են  թատրոնի պատմությունը՝ ստեղծումից մինչև մեր օրերը։ Բացահայտվում են թատերական կյանքի չբացահայտված անկյունները՝ թատրոնի ստեղծագործական կազմի, ադմինիստրատիվ անձնակազմի, թատրոնի շենքի պատմությունը։ «Թատրոնն էկրանին» ծրագրի իրականացումը հնարավորություն կընձեռի նաև թվայնացնել արխիվը. կստեղծվի թատրոնի ներկայացումներից կազմված տեսադարան»,- ասաց Գոռ Փելեշյանը, նշելով, որ ծրագիրը կարևոր է հատկապես թատրոնի ստեղծման 90-ամյակին ընդառաջ։
Ֆիլմերը նկարահանվել են ԿԳՄՍ նախարարության դրամաշնորհային ծրագրով։

Փետրվարի 27-ին էկրան կբարձրանան Անտոն Չեխովի «Արջը» և «Առաջարկությունը» ստեղծագործությունների հիման վրա նկարահանած հեռուստաներկայացումները։ Ռեժիսորն Արեն Օսիպյանն է, օպերատորները՝ Արսեն Շահնազարյանը և Արամ Սիրականյանը։ Գոռն ասաց, որ պիեսի ընթերցման ժամանակ ռեժիսորը որոշել է, որ կարելի է թատերականությունը պահպանել, սակայն նկարահանումներն անել բեմից դուրս․ «Համավարկի շրջանում ստեղծված այս նախագիծը կարելի է կոչել հեռուստաթատրոն, քանի որ էկրանավորվել է։ Մենք պատրաստ ենք և՛ դրական, և՛ բացասական արձագանքի, որովհետև մեր թատրոնի պատմության մեջ առաջին անգամ է նման ձևաչափ կիրառվում»։

Վերոնշյալ  նախագծերը թեև սկսվել են 2020-ին, բոլորիս հայտնի պատճառներով շարունակվեցին 2021-ին։
Քովիդի և պատերազմի պարտադրած մշակութային դադարը աբելյանցիները խախտել են 2020-ի վերջին՝ դեկտեմբերից մինչև հունվարի 13-ը ցուցադրելով  ամանորյա ներկայացումներ։ Այժմ ընթանում են փորձերը, պատրաստվում են առաջիկա ներկայացումներին։ Փետրվարի 6-ին կցուցադրվի «Պարոն 420»-ը։  Հովհաննես Թումանյանի ծննդյան օրը՝ փետրվարի 19-ին, կներկայացնեն Թումանյանի հեքիաթները, «Անուշը», Հրանտ Մաթևոսյանի  ծննդյան առիթով՝ «Աշանն արևը»։ Փետրվարի 27-ին, ինչպես արդեն նշեցինք, հեռուստաներկայացումների առաջնախաղն է։ Զուգահեռ փորձեր են ընթանում,պատրաստվում են առաջնախաղի․ կատակերգություն է բեմադրվում։