Նառա Նոյանը դարձյալ Հայաստանում է: «Ֆրանսիական շանսոնի էլեգանտ երեկոն» կայացավ: Վայրը՝ Գաֆէսճեան արվեստի կենտրոն: Երկխոսության ձևաչափը՝ կրեատիվ ու մտերմիկ: «Մենք ձեր հյուրն ենք, դուք՝ մեր»,- ասաց Նառա Նոյանը և Նաիրա Մանուչարյանի հետ ներկայացրեց Շառլ Ազնավուրի, Էդիթ Պիաֆի, Միշել Լեգռանի, Սալվատորե Ադամոյի, այլոց հայտնի երգերից: Հնչեցին նաև հայկական երգեր: Համերգի սկզբում, մինչ հանդիսատեսները կզբաղեցնեին իրենց տեղերը, վայելեցին մի դաշնամուրային ստեղագործություն՝ Նոյանի կատարմամբ: Դաշնամուրային մի քանի գործ ներկայացրեց Նառա Նոյանի մայրը՝ Ժաննա Բլբուլյանը:
Երեկոն էլեգանտ էր, ֆրանսիական, հայկական, նոյանական: Շատ էր և՛ երաժշտությունը, և՛ սերը: Երբ սիրում ես ինձ. ասում է Ազնավուրը: Հայտնի երգի (Quand tu m’aimes) հայերեն տարբերակը՝ Նառայի և Նաիրայի մեկնաբանությամբ, առանձնակի արձագանքի արժանացավ:
ardi.am –ի հետ զրույցում Նառա Նոյանն ասաց, որ այս տարի նորությունները շատ են լինելու: Իր և Նաիրա Մանուչարյանի կատարմամբ ֆրանսիական 12 երգից բաղկացած սկավառակ կթողարկվի: Նախատեսվում է նաև հեղինակային համերգ. երգչուհին կներկայանա բազմաժանր ծրագրով՝ ֆրանսիական, ռուսական երգեր, Կոմիտաս, դաշնամուրային գործեր, հեղինակային ստեղծագործություններ և այլն:
Արմինե Սարգսյան
No Comments