Ինչպես Ռիչարդ Ուիլյամսը ձևափոխեց մուլտֆիլմերի աշխարհը

Բրիտանական անիմատոր, կինոյի և անիմացիայի ռեժիսոր Ռիչարդ Ուիլյամսը հայտնի է բոլոր նրանց, որոնք այս կամ այն կերպ հետաքրքրվում են մուլտֆիլմերով կամ դրանց պատմությամբ։ Հենց նրա շնորհիվ աշխարհը սիրեց «Վարդագույն հովազին» և «Ով է դավել Ռոջեր ճագարին» ֆիլմում, մարդկանց կողքին, տեսավ մուլտհերոսների արկածները։ Իմացեք, թե Ռիչարդ Ուիլյամսը ինչ ներդրում է ունեցել մուլտիպլիկացիայի զարգացման մեջ։

Վարդագույն հովազը

Սկզբում հիշեցնենք, որ Ռիչարդը զբաղվել է ոչ միայն մեծ անիմացիոն գործերի ստեղծմամբ, այլև կարճ հոլովակներով։ Օրինակ՝ «Վարդագույն հովազի վերադարձը» ֆիլմի հանճարեղ բացման տիտրերը նրա ձեռքի գործն են։

Ով է դավել Ռոջեր ճագարին

Ուիլյամսի ամենահայտնի գործերից մեկը «Ով է դավել Ռոջեր ճագարին» ֆիլմն է։ Շատ մեծահասակներ դիտել են Ռոբերտ Զեմեկիսի այդ մարգարիտը։ Ինչո՞ւ հենց մեծահասակները։ Ֆիլմը թողարկվել է 1988 թվականին. սա նշանակում է՝ այն դիտող երեխաներն այսօր արդեն հասուն մարդիկ են և իրենց ընտանիքներն ունեն։

Ֆիլմը ներառում է անկրկնելի հումոր, բարդ սյուժե և ցնցող կերպարներ, այդ թվում՝ մուլտհերոսներ։ Այսքան տարիներ անց Ջեսիկան չի մոռացվել և չի խունացել նոր անիմացիոն հերոսների համապատկերում։ Այդ կինը, թեկուզ և անիմացիոն, խելքահան է արել հանդիսատեսներից շատերին և մինչ օրս համարվում է ամենագրավիչ մուլտհերոսուհին։

Բայց սա էլ ամենը չէ։ Ֆիլմը չորս «Օսկար» ունի՝ «Լավագույն մոնտաժ», «Լավագույն ձայնային մոնտաժ», «Մրցանակ՝ հատուկ ձեռքբերումների համար», «Լավագույն վիզուալ էֆեկտներ» անվանակարգերում։ Վիզուալ էֆեկտների, ավելի ճիշտ՝ կադրում հայտնվող մուլտհերոսների ճշմարտանմանության համար պատասխանատու էր Ռիչարդ Ուիլյամսը։ Հենց նա է մուլտհերոսներին դարձրել այնպիսին, ասես նրանք դուրս են եկել էկրանից դեպի աշխարհ, որտեղ մենք ենք ապրում։

Գողն ու կոշկակարը, համաշխարհային ռեկորդ

«Գողն ու կոշկակարը» ֆիլմը, որի ռեժիսորը, պրոդյուսերն ու նկարիչը Ուիլյամսն է, համարվում է համաշխարհային ռեկորդակիր։ Որքա՞ն ժամանակում է ստեղծվել արևելյան հեքիաթը. ռեկորդային երկար(գործընթացը տևել է 29 տարի)։ Բայց 1993-ին հանդիսատեսին հանձնված մուլֆիլմը հաջողություն չունեցավ։

Եվս մի քանի փաստ մեծ վարպետի կենսագրությունից

Ռիչարդ Ուիլյամսը ծնվել է Տորոնտոյում, 1933 թվականի մարտի 19-ին։

Կանադայում սովորել է նկարչական դպրոցում, ապա երկու տարի եղել է Իսպանիայում, որտեղ զբաղվել է նկարչությամբ։

1950-ականներին տեղափոխվել է Մեծ Բրիտանիա։

1958-ին Ռիչարդ Ուիլյամսն ավարտել է իր առաջին անիմացիոն ֆիլմը՝ «Փոքր կղզին», որի համար արժանացել է BAFTA մրցանակի (Բրիտանական կինոյի և հեռուստատեսային արվեստի մրցանակ)՝ «Լավագույն անիմացիոն ֆիլմ» անվանակարգում։

1971-ին Ուիլյամսը թողարկել է «Ամանորյա երգը» անիմացիոն ֆիլմը, որի համար ստացել է իր առաջին «Օսկարը»(1973 թ.): Նա արժանացել է ավելի քան 250 միջազգային մրցանակի։

Ռիչարդ Ուիլյամսը մահացել է 2019 թվականի օգոստոսի 16-ին։

Մենք՝ որպես հանդիսատես, շնորհակալություն ենք հայտնում Ռիչարդ Ուիլյամսին այն հետքի համար, որ նա թողել է անիմացիայի պատմության մեջ։ Շնորհակալ ենք, որ նա այդպես ձևափոխեց կենդանի նկարների ոչ փխրուն աշխարհը և դրան նոր շունչ հաղորդեց՝ շատերի համար դառնալով օրինակ։

Անգլերենից փոխադրեց Իսրայել Ասրյանը
Աղբյուրը՝ tlum.ru