Լուսիկ Ագուլեցի-Lusik Aguleci թանգարանը և նրա տարածքում գործող Aguletsi Art Cafe-ն հայկական հարուստ ավանդույթների յուրատեսակ պատկերասահ են ներկայացնում իրենց կամարների ներքո հայտնված հայ և օտարազգի արվեստասերներին: Իր շքեղ հավաքածուի, գեղանկարչական ստեղծագործությունների, ամուսնու՝ Յուրի Սամվելյանի քանդակների, զավակների, թոռների, անգամ մանկահասակ ծոռների տարաժանր հորինվածքների համահավաք ցուցադրության գաղափարը հայուհու բացառիկ տեսակն իր մեջ կրող ու մատուցող տիկին Լուսիկին հանգիստ չէր տալիս տասնամյակներ շարունակ: Այս տունը պարզապես չէր կարող չդառնալ լայն հանրության սեփականությունը, որովհետև նման գանձերը մարդկանցից թաքցնելը մեծ մեղք կլիներ:
Փա՜ռք Աստծո, որ այս անգամ մշակութային կարևոր իրողության ծնունդը չեղավ ուշացած, և Լուսիկ Ագուլեցին իր երկրային կյանքի օրոք տեսավ-վայելեց այս շեն ընտանեկան օջախի փոխակերպումը մշակութային եռուն կենտրոնի:
Ինչպես որ իր տուն եկող հյուրերին էր պարուրում հայաշունչ ու հայաբույր ջերմությամբ, այդպես էլ իր մշակութային կենտրոնի դռները բացողներին վերաբերվեց՝ հղելով հետևայլ ուղերձը. «Իմ ողջ գիտակցական կյանքում՝ սկսած վաղ մանկությունից, ես մտքով և ստեղծագործությամբ ամբարել եմ հայոց տոնածիսական մշակույթը՝ հեքիաթային գեղեցկության մի խորհրդավոր աշխարհ, որը լի է իրական ու անիրական զանազան կերպարներով, զանազան հրաշքներով: Ահա վերջապես եկել է պատեհ առիթը, որպեսզի այդ ամենը ես վերադարձնեմ տիրոջը՝ մեր մեծ ու ստեղծագործ ժողովրդին»:
Այս պատվարժան տիկնոջ անձի շուրջ հյուսվող պատմություններն անսպառ էին և են՝ իրենց բազմազանությամբ և անսպասելիությամբ: Վերջին տարիներին նրա կերպարին նոր խորհրդավորություն հաղորդեց ադրբեջանցի գրող Աքրամ Այլիսլիի «Քարե երազներ» վեպի գլխավոր հերոսուհին լինելու հանգամանքը: Հեռավոր Երուսաղեմ քաղաքում վեպի՝ օտար լեզվով թարգմանիչներից մեկը՝ Սերջիո Սելիանը, իմանում է, որ Այլիսլիի հերոսուհին մտացածին չէ, այլ իրական կերպար: Նրա կինն շտապում է Երևան՝ հանդիպելու առասպելական այդ հայուհուն, որի հանդեպ «Քարե երազների» հեղինակի հիացմունքը սահմաններ չի ճանաչում:
Հայկական, առավելապես՝ ագուլիսյան ավանդույթները ներկայացնող բազմաթիվ և բազմաբնույթ ցուցանմուշները, նաև եվրոպական, ռուսական, արևելյան մշակույթի և կենցաղի նմուշները այս կենտրոնի այցելուներին տեղափոխում են անսկիզբ-անվերջ հեքիաթի մի հարուստ աշխարհ, իսկ սրճարանի հայկական կերակրատեսակների ցանկը, անվանումներից սկսած, պարզապես տրամադրում է հաճելի վայելքի ու հիացումի:
Այս տանից հեռանալիս երբեք չես ունենում լիարժեք հագեցումի վիճակ, քանզի հնարավոր չէ այն թողնել անկարոտ, առանց վերադառնալու ձգտումի: Հետևաբար, Լուսիկ Ագուլեցի-Lusik Aguleci թանգարանն ու Aguletsi Art Cafe-ն մեր քաղաքի այն գրավիչ վայրերից են, որոնք ենթադրում են անվերջ վերադարձ՝ երբեք չդադարելով զարմացնել ու հիացնել այստեղ ոտք դրած որևէ մեկին, եթե անգամ դա առաջին, երկրորդ, երրորդ, չգիտեմ որերորդ այցելությունն է:
Կարինե Ռաֆայելյան
Լուսանկարները՝ Լուսիկ Ագուլեցի-Lusik Aguleci թանգարանի
Հ.Գ. Ardi.am-ի ԴիտաՆյութ խորագրի ՏեսաԳիր բաժնում ներկայացված են Լուսիկ Ագուլեցի-Lusik Aguleci թանգարանի երկու ցուցանմուշ:
No Comments