Մեղվիկը ճամփորդում էր․․․

Արցախցի փոքրիկների համար տարատեսակ մշակութային միջոցառումներ են կյանքի կոչվում։  Ներկայացնում ենք դրանցից մի քանիսը։ 
Հովհաննես Թումանյանի անվան պետական տիկնիկային թատրոնը հոկտեմբերի 7-ին խաղալու է  միայն արցախցի փոքրիկների համար, իսկ հոկտեմբերի 10-ին և 11-ին ներկայացումներ կլինեն և՛ արցախցի, և՛ ոչ արցախցի  փոքրիկների համար։ Հոկտեմբերի 7-ին նախատեսված է «Անխելք մարդը», 10-ին` «Վիննի Փուհ արջուկը», 11-ին` «Ոզնու մուշտակը» ներկայացումները։

Հենրիկ Մալյանի անվան թատրոնը  հոկտեմբերի 7-ին ներկայացնում է Բիսեթի «Շրջված երազները»,  հրավիրված են նաև Արցախից ժամանած փոքրիկները։

Սոս Սարգսյանի անվան Համազգային պետական թատրոնի  ֆեյսբուքյան էջում գրված է․  «Այսօր մեր մեղվիկը ճամփորդում էր իրենց բնակավայրից ժամանակավորապես հեռու գտնվող երեխաներ հետ։ Կցված են նաև լուսանկարներ»։

Թատրոնի տեղեկատվական բաժնից մեզ հայտնեցին, որ Յուրիս Զվիրգզդինշի «Փոքրիկ մեղվի մեծ ճանապարհորդությունը» հեքիաթի բեմականացումը արցախցիների համար  ներկայացրել են հոկտեմբերի 3-ին։ Նույն ներկայացումը Դիլիջան ժամանած արցախցի փոքրիկները կվայելեն հոկտմբերի 6-ին և 7-ին։

Հոկտեմբերի 6-ին՝ ժամը 13։30-ին,  Ա․ Սպենդիարյանի տուն-թանգարանը կհյուրընկալի արցախցի 15 փոքրիկների, որոնք իրենց ձեռքերով կպատրաստեն խաղաղության համեղ տորթը։ Ծրագում՝ շրջայց թանգարանում, կրթական ծրագիր, տորթի պատրաստում, մուլտերի դիտում։ 

«Այսօր կրկին Արևի քաղաք Էրեբունի էին այցելել Արցախի արևաշողերը։ Թանգարանի մյուս այցելուներն էլ միացան նրանց»,- գրել է Էրեբունի պատմահնագիտական արգելոց-թանգարանի տնօրեն Միքայել Բադալյանը ֆեսբուքյան իր էջում և հեշթեգել՝ Հաղթելու ենք։