Nightwish-ն առաջադրվել է Ֆիննական հեղինակավոր Emma Awards մրցանակաբաշխության չորս անվանակարգում՝ «Տարվա ալբոմ», «Տարվա խումբ», «Տարվա մետալ-ալբոմ», «Հանդիսատեսի տարվա ընտրություն»։ Մրցանակաբաշխությունը կանցկացվի մայիսի 14-ին, Հարթվոլ Արենայում։
Այս մասին տեղեկանում ենք Nightwish-ի ֆեյսբուքյան էջից։
Nightwish-ը («Նայթվիշ»-ը) կանանց վոկալով ֆիննական սիմֆոնիկ մետալ խումբ է (կատարումները հիմնականում անգլերեն են)։ Հիմնադրել են Տուոմաս Հոլոպայնենը, Էռնո «Էմպպու» Վուորինենը և Տարյա Տուրունենը, Կիտեե քաղաքում։
Խումբ ստեղծելու գաղափարը Տուոմաս Հոլոպայնենի գլխում ծնվել էր արշավի ժամանակ՝ ընկերների հետ խարույկի շուրջ գիշերն անցկացնելուց հետո։ Խումբը ձևավորվեց 1996-ի հուլիսին։ Հոլոպայնենը հրավիրեց Տարյա Տուրունենին, որն ուներ վոկալիստի ակադեմիական կրթություն։ Խմբին միացավ նաև Էռնո Վուորինենը։ Սկզբում խմբի ոճը հիմնված էր Տուոմասի՝ ստեղնաշարներով և ակուստիկ կիթառով էքսպերիմենտների և Տարյայի օպերային ձայնի վրա։ 1997-ի սկզբին նրանց միացավ հարվածային երաժիշտ Յուկկա Նևալայնենը, իսկ ակուստիկ կիթառը փոխարինվեց էլեկտրականով։
Nightwish-ը՝ սիմֆոնիկ-մետալ ժանրի ամենաազդեցիկ ու առաջին խմբերից մեկը, իր պատմության ընթացքում երկու անգամ փոխել է վոկալիստին․ 2007-ին Տարյային փոխարինեց Անետտ Օլզոնը, իսկ վերջինիս 2012-ին փոխարինեց Ֆլոոր Յանսենը։ Առանձին երգերի ձայնագրություններում մասնակցել են նաև հրավիրված տղամարդ վոկալիստներ։ Իսկ 2001-ից սկսած՝ երկրորդ վոկալիստի դերը ստանձնեց Մարկո Հիետալան։
Խմբի երգերի հեղինակ Տուոմասը պնդում է, որ ոգեշնչվել է բոլորովին տարբեր ոճերի և ուղղությունների երաժշտություններից՝ ծանր-մետալ, դասական, ֆոլկլոր, ֆիլմերի սաունդթրեքներ։ Nightwish-ի երգերի լիրիկական բնույթի վրա ազդեցություն են ունեցել նաև ֆենթզի ժանրի գրքերն ու ֆիլմերը։ Խմբի կոմպոզիցիաներից շատերը պարունակում են ֆոլկ-տարրեր, իսկ երաժշտությունը դասակարգվում է որպես սիմֆոնիկ մետալ և փաուեր-մետալ։
Պատրաստեց Իսրայել Ասրյանը
No Comments