Վանաձորի Հովհաննես Աբելյանի անվան պետական դրամատիկական թատրոնում ըստ Բրեդ Բյորդի սցենարի` տեղի ունեցավ «Ռատատույ» ներկայացման պրեմիերան։
Ներկայացման ռեժիսորը Ժիրայր Գաբրիելյանն է, բեմականացման հեղինակները՝ Արմինե Բոյաջյանը և Նարեկ Մանուչարյանը, բեմանկարչության և զգեստների հեղինակը՝ Լիլիթ Մխիթարյանը, երաժշտական ձևավորումների և տեխնիկական հնարքների պատասխանատուն՝ Հրանտ Վարդումյանը, լույսի նկարիչներն են Դավիթ Գալստյանն ու Աշոտ Գևորգյանը, դեկորատոր և բուտաֆորիստ՝ Տիգրան Աբգարյանն ու Անահիտ Գևորգյանը։ Ներկայացման մեջ զբաղված են թատրոնի երիտասարդ դերասանները, աշակերտներ և ուսանողներ հանրակրթական դպրոցներից և կրթական այլ հաստատություններից։
Ներկայացումը պատմում է երիտասարդ առնետ Ռեմիի մասին․ նա ֆրանսիական խոհանոցի մեծ սիրահար է, իր երազանքներին հասնելու համար անցնում է բազմապիսի փորձությունների միջով, մինչև որ կարողանում է դառնալ հայտնի խոհարար։ Ստացվել է գունեղ ու հետաքրքիր ներկայացում, որը վստահաբար երկար է մնալու Վանաձորի թատրոնի խաղացանկում և հիացնելու է թե՛ կրտսեր, թե՛ մեծահասակ հանդիսատեսին։ Բեմադրության մեջ հետաքրքիր է ներկայացված գաղափարը․ տարբեր են մարդիկ էլ, առնետներն էլ․․․ Տարբեր են նաև երազանքին հասնելու ճանապարհները։
Արտահայտած կարծիքների մեջ ամենահետաքրքիրը թերևս այն էր, որ ներկայացումից հետո սկսում ես սիրել առնետներին և մտածում մարդ-առնետների մասին։
Ardi.am