Եվրամիության փառատոնային ասոցիացիայի դրոշը փոխանցվելու է Հայաստանին

«Երևանյան հեռանկարներ» միջազգային երաժշտական 22-րդ փառատոնն առաջին անգամ Հայաստանում ներկայացնում է աշխարհում բացառիկ երևույթ համարվող Լոնդոնի Գոսպել երգչախմբին: Նրա  անդամները եզակի մենակատարներ են, որոնք չեն դադարում զարմացնել և գերել իրենց հարյուր հազարավոր երկրպագուներին: Երգչախմբի երևանյան համերգը տեղի կունենա դեկտեմբերի 21-ին՝ ժամը 19.00-ին, Կարեն Դեմիրճյանի անվան մարզահամերգային համալիրի համերգային դահլիճում։ Սպասվող համերգի, «Երևանյան հեռանկարների» առաջիկա ծրագրերի մասին Ardi.am-ը զրուցել է փառատոնի գլխավոր մենեջեր Սոնա Հովհաննիսյանի հետ։

— Լոնդոնի Գոսպել երգչախմբի այցը վաղո՞ւց էր նախատեսված։ 

— Անկեղծ ասած՝ այս երգչախմբի Հայաստան գալու հարցը արդեն չորս տարի է՝ օրակարգում էր, մեծ ոգևորություն կար, որ այս երգչախումբը պետք է մեր երկրում ելույթ ունենա։ Բայց ամեն անգամ ինչ-ինչ պատճառներով ձգձգվում էր։ Կարծում եմ՝ մեծ հաջողություն է, որ և՛ օրերը համընկան, և՛ այնպես ստացվեց, որ Միջին Արևելք են ուղևորվում Երևանով։

Նրանք իսկապես բացառիկ են, ունեն հարուստ ու հետաքրքիր ավանդույթ։ Ես երեկ առիթ ունեցա ավելի շատ տեսահոլովակներ դիտելու, ուսումնասիրելու, պետք է ասեմ՝ անչափ տպավորիչ էր։ Երևի աշխարհի միակ երգչախումբն է, որ ելույթ է ունեցել 100-հազարանոց լսարանի առջև։ Ասում ենք՝ երգչախումբ, բայց իրենց կազմում կան հարվածային գործիքներ, կիթառ, ստեղնաշար, այսինքն՝ զուտ ակուստիկ երգեցողություն չի։

— Ծանո՞թ էին Հայաստանին։

— Հայաստանին, որպես այդպիսին, ծանոթ չէին, խմբի ստեղծագործական կազմի, դիրիժորի կամ տնօրենի հետ հայաստանյան թեմա չի քննարկվել։ Դեր են խաղացել Բրյուսելի ամենամյա համաժողովներում երգչախմբի մենեջմենթի հետ հանդիպումները, ընկերական-բարեկամական հարաբերություններն ու ըստ այդմ՝ ձեռք բերված համաձայնությունը։

— Վերջին տարիներին «Երևանյան հեռանկարներում» ի՞նչ ծրագրային փոփոխություններ են եղել։ Եվ ի՞նչ է սպասվում նոր տարում։

— 2020-ին մեծամասշտաբ ծրագրեր ունեինք։ Սեպտեմբերին նախատեսված էր աշխարհի լավագույն երգչախումբը համարվող Մոնտեվերդիի այցը Հայաստան՝ Սըր Ջոն Էլիոթ Գարդիների և իր նվագախմբի հետ։ Քովիդի պատճառով մեր այս բացառիկ ծրագիրը տեղափոխվեց 2021 թվականի մայիս, հետո նորից հետաձգվեց անորոշ ժամանակով։ Մեր օրերի ամենահայտնի տենորների եռյակը համալրող Ռոլանդո Վիլազոնի համերգը՝ գեղեցիկ ծրագրով, նույնպես հետաձգվել է։ Բայց արդեն որոշակիացել են ժամկետները։

Եկող տարին սկսում ենք մշակութային ամենամեծ միջոցառումով։ Մայիսին Հայաստանում անցկացվելու է Եվրոպայի փառատոնային ասոցիացիայի հոբելյանական 70-րդ գագաթնաժողովը։ Մասնակցելու են Եվրամիության մշակույթի և այլ հանձնակատարներ, մի շարք քաղաքապետեր, զբոսաշրջային, բիզնես և այլ ոլորտների ներկայացուցիչներ: Եվրոպական առաջատար լրատվամիջոցների ուշադրությունը ուղղվելու է դեպի Հայաստան` լայնորեն լուսաբանելով մեր երկիրն ու մշակույթը։

Այս օրերին Իռլանդիայի Գալուվեյ քաղաքում տեղի է ունենում համաժողովը, որին, ցավոք, չկարողացանք ներկա լինել (մեր զրույցը տեղի է ունեցել նախօրեին- հեղ․): Նոյեմբերի 24-ին Եվրամիության փառատոնային ասոցիացիայի դրոշը փոխանցելու է Հայաստանին։

— Ինչպե՞ս որոշվեց մշակութային այս կարևորագույն միջոցառումն անցկացնել Հայաստանում։

— 7-8 տարվա բանակցությունների արդյունք է, որն իրականացրել ենք՝ մասնակցելով Բրյուսելում և այլուր տեղի ունեցող ամենամյա համաժողովներին։

Եկող տարի նույն օրերին, հավանաբար, այստեղ կլինի հայազգի աշխարհահռչակ դիրիժոր Ալան Ալթինօղլուն, մենք հիմա բանակցում ենք մի շարք այլ մեծանուն երաժիշտների հետ։ Կան ծրագրեր, որոնք հաստատված են, շուտով կհայտարարենք համերգների օրը։

Ասեմ նաև, որ համավարակը, պատերազմը ոչ միայն ծրագրային փոփոխությունների պատճառ են դարձել, այլև ֆինանսական խնդիրների։ Մենք նոր թափ պետք է հավաքենք՝ մասնավոր ընկերությունների հետ համագործակցելով։

— Վերադառնանք Լոնդոնի Գոսպել երգչախմբի առաջիկա համերգին․ ի՞նչ ծրագրով են ներկայանալու, հնարավո՞ր է  հայկական երգ կատարեն։

— Ծրագիրն իրենք են ընտրել, նույն ծրագրով դեկտեմբերին մի քանի քաղաք են մեկնում։ Կհնչեն խմբի ամենահայտնի հիթերը, ինչպես նաև ամանորյա և սուրբծննդյան երգեր: Ինչ վերաբերում է հարցի երկրորդ մասին՝ չգիտեմ՝ նման մտադրություն ունե՞ն, թե ոչ, բայց եթե հնարավոր լինի (իհարկե՝ ոչ առանց մեր մասնակցության), թող լինի անակնկալ մեր հանդիսատեսի համար։

— Այս համերգը դրսից ունկնդիր կունենա՞։

— Վստահ ասում եմ՝ այո, և՛ Ռուսաստանից, և՛ Վրաստանից արդեն տոմսեր են պատվիրել ու գնալով հետաքրքրությունը մեծանում է․ դրսից զանգերը շատանում են։

Զրուցեց Արմինե Սարգսյանը