Հատուկ ցուցադրություն, «Նուբայի սիրտը»

«Բարեփոխելով աշխարհը» խորագիրը կրող հեռուստահաղորդումների և կինոյի փառատոնը մեկնարկում է Քենեթ Քարլսոնի «Նուբայի սիրտը» ֆիլմով: Հոկտեմբերի 15-ին, ժամը18:00-ին «Մոսկվա» կինոթատրոնում նախատեսվող ցուցադրությանն իրենց մասնակցությունը կբերեն ֆիլմի գլխավոր հերոս, «Ավրորա» մարդասիրական նախաձեռնության նախագահ, 2017 թ. «Ավրորա» մարդասիրական մրցանակի դափնեկիր բժիշկ Թոմ Քաթինան և ֆիլմի ռեժիսոր Քենեթ Կարլսոնը։

«Նուբայի սիրտը» պատմություն է ամերիկացի բժիշկ Թոմ Քաթինայի մասին, ով անձնուրաց ծառայում է Սուդանի` պատերազմից ավիրված Նուբա լեռներում բնակվող մոռացված մարդկանց կարիքներին։ Լիամետրաժ վավերագրական ֆիլմը բառացիորեն ոգեշնչել է շարժում, որը միտված է փրկել կյանքեր։ Այն նաեւ հավաքել է գրեթե 600,000 ԱՄՆ դոլար նվիրատվություն, որից ամբողջ 100%-ն ուղղվել է բժշկական պարագաների ձեռքբերման, անձնակազմի ուսուցման և Սուդանի հարավում գտնվող «Գթության մայր» հիվանդանոցի այլ կարևորագույն կարիքների հոգման համար։
Ֆիլմի ցուցադրությանը կնախորդի հյուրասիրություն։ Մուտքն ազատ է:

«Բարեփոխելով աշխարհը» կինոյի և հեռուստահաղորդումների անդրանիկ փառատոնը (Impact Humanity Television and Film Festival (IHTFF)), կկայանա Երևանում 2019թ․-ի հոկտեմբերի 15-ին և 16-ին «Մոսկվա» կինոթատրոնում: Այն կանդրադառնա մարդու իրավունքների թեմային նվիրված հեռուստատեսային և կինոնախագծերին, որոնք ուղված են մարդասիրական սկզբունքների պահպանմանը և զարգացմանը։  

Փառատոնն անցկացվում է «Ավրորա» ֆորումի շրջանակում :

«Ավրորա» ֆորումը բացառիկ և հավակնոտ նոր ասպարեզ է, որը ձգտում է աշխարհի հրատապ մարտահրավերները հաղթահարել մարդասիրական ու կրթական լավագույն փորձերի կիրառմամբ՝ խթանելու համար սոցիալական, մշակութային, գիտական ու տեխնոլոգիական զարգացումները:

Ardi.am