Տասներկու ընկերներով որոշել են՝ օգոստոսի 12-ին, ժամը 12-ին Բյուրականի «Հանդart» այգում անցկացնել նախադեպը չունեցող մեկօրյա կրթական, մշակութաժամանցային Jazz Business միջոցառում։
Այսօր հրավիրված մամուլի ասուլիսի ժամանակ բանախոսները մանրամասներ են ներկայացրել։
Jazz Businessն ունի բազում բաղադրիչներ և ոչ ֆորմալ կրթական հարթակ է ստեղծում ոչ միայն երիտասարդների համար, այլ բոլոր նրանց, ովքեր սիրում են հաճելին օգտակարի հետ համատեղել։
Կրթություն բնության գրկում․ սա «Stand-Up»-ների դինամիկ շարք է՝ անձնային աճից մինչև մոտիվացիա, հաղորդակցման հմտություններից մինչև բիզնես և արհեստական բանականություն։ Իսկ միջոցառման բանախոսները ոլորտի առաջատար մասնագետներ են և իրե՛նց օրինակով են ճանապարհներ ցույց տալու։
«Գրքատուն» հրատարակչության և «Friend’s House» կենտրոնի հիմնադիր-տնօրեն Արմեն Նիազյանը նշեց՝ ամբողջովին տիրապետում են երկրի այսօրվա վիճակին, ծառացած բազմաթիվ մարտահրավերներին։
-Իմ սիրելի խոսքերից է՝ լավ է կյանքում մեկ մոմ վառել, քան ամբողջ կյանքում անիծել խավարը։ Այս միջոցառումը ևս մոմ է, որ փորձում ենք վառել,- ասաց Նիազյանը, ապա ներկայացրեց միջոցառման օրակարգը։ Նա նույնպես հադես է գալու «Անձնային աճի 5 կարևոր դուռ» թեմայով բանախոսությամբ։
Բանախոսության թեմաները բազմաբովանդակ են։ «Բի Էս Սի» բիզնեսի աջակցման կենտրոնի հիմնադիր Սամվել Գևորգյանը կբանախոսի «Սեփական բիզնես սկսելու 5 կարևոր պատճառ» թեմայով։ Ի դեպ, նա հեղինակել, հայերեն ու անգլերեն հրատարակել է բիզնես և մոտիվացիոն գրքեր՝ «Քո սեփական բիզնեսը Հայաստանում» և «1 րոպե անց» վերնագրերով, որոնք ունեն ընթերցողների մեծ բանակ։
Սամվել Գևորգյանը շեշտեց՝ կարևորել են բոլոր՝ բիզնես, կրթական, մշակութային և սոցիալական բաղադրիչների առկայությունը։
-Մենք կարևորում ենք նաև երիտասարդների ներգրավվածությունը, նրանց կրթությունը, բիզնես գաղափարների զարգացումը։ Համագործակցում ենք «Զինվորի տան» հետ, այնտեղ էլ կլինեն երիտասարդներ, ովքեր ցանկանում են սկսել իրենց բիզնեսը։ Նրանց նույնպես մեծ հնարավորություն ենք ընձեռել,-նշեց Սամվել Գևորգյանը, հավելեց, որ Ջազ Բիզնեսը կանգնում է ՌեԱրմենիայի ՄետաԳեյթ նախագծի կողքին՝ տոմսերի վաճառքից հասույթի մի մասը փոխանցելով վերջիններիս։
«Targeting» և «Simple Business Academy» ընկերությունների համահիմնադիր-տնօրեն Գոռ Կարապետյանն էլ նշեց՝ միայն երազող մարդիկ կարող են նման իրավիճակում նախաձեռնել օգտակար միջոցառում, այդպիսով, նաև լավատեսական ուղերձ հղելով հանրությանը, որ լավատես լինեն և համոզված՝ յուրաքանչյուր նախաձեռնությունից է կախված նաև մեր սերը, հավատն առ հայրենիքի շենացում։
-Ինչո՞ւ ենք մենք շատ ակտիվ ոչ ֆորմալ կրթական ծրագրերի մեջ, որովհետև մենք ինքներս մեր կաշվի վրա զգացել ենք կրթության պակասը։ Ոչ ֆորմալ կրթությունը, որը օգնել է մեզ, այսօր փորձում ենք անշահախնդրորեն փոխանցել նաև մարդկանց։ Սա փորձ է նաև՝ ինչ-որ առումով մեղմելու մեր կրթության բացերը։
Հավելենք, որ մեկօրյա այս միջոցառման շրջանակում «Ayvazyan & Partners» ընկերության հիմնադիր, «YAMS» կրթական ակադեմիայի հիմնադիր տնօրեն Վահե Ռոբեր Այվազյանը հանդես կգա «Ժամանակակից առաջնորդը» բանախոսությամբ։ Ինֆորմատիվ և օգտակար բանախոսություններն այդքանով չեն սահմանափակվում։ «Smartology» ընկերության հիմնադիր Արտակ Հարությունյանը կներկայացնի «Ինչպես կորցնել բիզնես էջը ընդամենը 2 քլիքով, առանց հավելյալ ջանքերի» թեման։ Կբանախոսեն նաև «Targeting» և «Simple Business Academy» ընկերությունների համահիմնադիր տնօրեն Գոռ Կարապետյանը՝ «Հաջողության թաքնված կողմը», «Copywriting Academy» ընկերության հիմնադիր Ռուբեն Կարոյանը՝ «Երբ ճոխը սուտ է դառնում», «Karapp» հայկական N1 կրթական հավելվածի համահիմնադիր և գործադիր տնօրեն Շավարշ Կարապետյանը՝ «Ներդնելով AI տեխնոլոգիաներ», «Սուրբ Գրիգոր Լուսավորիչ» բժշկական կենտրոնի տնօրենի` ընդհանուր հարցերի գծով տեղակալ Ավետիս Ավետիսյանը՝ «ՆեթWorking-ի 5 կանոն 500 ազդեցիկ կապ ստեղծելու համար» թեմաներով։
Նաև տեղեկացանք, որ միջոցառման մասնակիցները հնարավորություն են ստանալու վեց ամիս անվճար հիմունքներով օգտվել «Karapp» հայկական կրթական հավելվածից։ Իսկ միջոցառման մշակութաժամանցային մասն ապահովելու է Մալխաս ջազ տրիո բենդը։ «SMART խարույկի» շուրջ` բաց քննարկումներով և շփումներով ամփոփվելու է մեկօրյա միջոցառումը։
Հիշեցնենք, որ Jazz Business միջոցառումն իրականացվում է «Bemel Production»-ի, «Գրքատուն» գրախանութի և «Karapp»-ի հետ համատեղ ջանքերով։
Վովա Արզումանյան
No Comments