«Թեքեյան Կենտրոն»-ում բացվել է Վիկտոր Դանիլովի լուսանկարչական աշխատանքների ցուցահանդեսը։ Լուսանկարները սև-սպիտակ են։ Խորագիրն է «Արվեստը՝ հանուն խաղաղության»։ Պատկերները քաղաքային են։ Հիմնականում՝ նյույորքյան։ Ձյունածածկ մեքենաներ, շենքեր, ծառեր, մետաղական կամուրջ և այլ կառույցներ, բակում թղթախաղ ու շախմատ խաղացող պապիկներ, փողոցում կայանած հեծանիվ, որտեղ կայանել չի թույլատրվում, արդուկ հիշեցնող բարձրահարկ, ստվերներ․․․
Ցուցահանդեսը մարդաշատ էր․ լուսանկարիչներն ու լուսանկարչական արվեստի սիրահարները շրջում էին սրահում ու Դանիլովի սև- սպիտակ աշխարհում։ Ամերիկաբնակ արվեստագետը միջոցառման մասնակիցներին հետևում էր հեռավար՝ տեսակապով։
Ցուցահանդեսը համակարգել է լուսանկարիչ Արմեն Ենգոյանը։ Ardi.am-ի հետ զրույցում պատասխանելով «ինչու՞ սև-սպիտակ» հարցին՝ ասաց, որ սև-սպիտակը մոտեցում է, որոշ դեպքերում գույնն ասես շատախոսություն լինի․ «Դանիլովն ունի նաև համակարգչային գրաֆիկական մեծ ծավալի հետաքրքիր գործեր, այս անգամ որոշել է ներկայանալ սև-սպիտակ լուսանկարների ձևաչափով»։
Վիկտոր Դանիլովը ծնվել է Թբիլիսիում: Մասնագիտությամբ երաժիշտ է։ Ելույթ է ունեցել Վրաստանի պետական սիմֆոնիկ նվագախմբում։ Լուսանկարչությունը միշտ սիրել է։ 20-րդ դարի վերջին Նյու Յորք տեղափոխվելուց հետո լուսանկարելը դարձել է նրա հիմնական աշխատանքը։ Ունեցել է բազմաթիվ ցուցահանդեսներ, արժանացել մրցանակների, պատվոգրերի, շնորհակալագրերի։ 2007-ին հիմնել է լուսանկարիչների PhotoPodium.com միջազգային կայքը՝ միավորելով տարբեր երկրների պրոֆեսիոնալ ու սիրողական լուսանկարիչներին։ Աշխարհի տարբեր երկրներում լուսանկարչական ցուցահանդեսները կյանքի են կոչվում հենց այս հարթակի միջոցով։ Միայն Հայաստանում՝ Երևան, Գյումրի և Սպիտակ քաղաքներում, կազմակերպվել են տասնյակից ավելի ինչպես անհատական, այնպես էլ համատեղ միջազգային լուսանկարչական ցուցահանդեսներ:
Ցուցահանդեսի կազմակերպմանն աջակցում է «Թեքեյան Կենտրոն» հիմնադրամը: Հանրության համար այն բաց կլինի շուրջ երկու շաբաթ։ Հաջորդ կանգառը Փարպին է։
Ardi.am
No Comments