Համավարակի պատճառով երկար դադարից հետո Հովհաննես Աբելյանի անվան պետական դրամատիկական թատրոնի դերասանները թատրոնի հետնաբակում հանդես են եկել «Հեքիաթը մեր այգում» բացօթյա մանկական ներկայացմամբ։
Ներկայացման մեջ ընդգրկված են թատրոնի երիտասարդ և միջին սերնդի դերասաններ։ Ռեժիսորը Արամ Մխիթարյան է։
«Մեր կրտսեր հանդիսատեսը ներկայացումը սիրեց, ինչի վառ ապացույցը երեխաների ջերմ ու ոգևորված տրամադրությունն էր»,- ասաց թատրոնի լրատվության և հասարակայնության հետ կապերի պատասխանատու Գոռ Փելեշյանը, նշելով, որ բացօթյա ներկայացումները կրելու են շարունակական բնույթ։
Մանկական ներկայացումից զատ՝ աբելյանցիները պատրաստվում են Ստեփան Զորյանի «Խնձորի այգին» բացօթյա ներկայացման առաջնախաղին, որը տեղի կունենա սեպտեմբերի 15-ին, ժամը 18:30-ին, Վանաձորի Ստեփան Զորյանի տուն-թանգարանի այգում՝ նվիրված արձակագրի 130-ամյա հոբելյանին։ Ներկայացման ռեժիսորը թատրոնի գեղարվեստական ղեկավար, ՀՀ ժողովրդական արտիստ Վահե Շահվերդյանն է։
No Comments